Qazaqstan namysyn 15 oqýshy qorǵaıdy.
Elordada mektep oqýshylarynyń hımıa páni boıynsha halyqaralyq 57-shi Mendeleev olımpıadasy bastaldy, dep habarlaıdy Almaty-akshamy.kz Oqý-aǵartý mınıstrligine silteme jasap.
Olımpıadaǵa 20-dan astam eldiń oqýshylary qatysady. Onyń ishinde Reseı, Avstrıa, Saýd Arabıasy, Armenıa, Izraıl, Ózbekstan jáne basqa da memleketterdiń qatysýshylary bar.
Komanda quramalary buǵan deıingi ulttyq hımıa olımpıadalarynyń nátıjesinde anyqtalyp, iriktelgen. Qazaqstan namysyn 15 oqýshy qorǵaıdy.
«Balalar arasyndaǵy hımıadan halyqaralyq Mendeleev olımpıadasy bizdiń elimizde osymen tórtinshi ret ótkizilip jatyr. Bul jyly negizgi is-sharalar Astanada ótedi. Atap aıtqanda, oqýshylar óz bilimin tehnıkalyq jabdyqtalýy olımpıada talaptaryna saı keletin Nazarbayev University laboratorıalary men aýdıtorıalarynda synǵa salady»- deıdi «Daryn» ortalyǵynyń dırektory Gajdembek Tursynov.
Olımpıada alty kúnge sozylady jáne úsh kezeńnen turady: ekeýi teorıalyq jáne bireýi praktıkalyq.
Olımpıada uıymdastyrýshylary retinde qabyldaýshy taraptan Qazaqstannyń oqý-aǵartý mınıstrligi, Reseı tarapynan M.V.Lomonosov atyndaǵy MMÝ-niń hımıa fakúlteti men Andreı Melnıchenko atyndaǵy qor.
Olımpıada qorytyndysy boıynsha qatysýshylarǵa sertıfıkattar men estelik syılyqtar, jeńimpazdar men júldegerlerge dárejeleri boıynsha dıplomdar men medaldar tabystalady.
Absolútti jeńimpazǵa jarysty uıymdastyrýshylar taǵaıyndaǵan akademık Valerıı Lýnın atyndaǵy syıaqy tapsyrylady. Olımpıada 1-6 mamyr aralyǵynda ótedi.