Oqý baǵdarlamalarynyń kemshilikterin túzeý kerek – Asqat Aımaǵambetov
Bilim jáne ǵylym mınıstrliginiń apparat jınalysynda mınıstr Asqat Aımaǵambetov oqý baǵdarlamalary jańartylatynyn aıtty, dep habarlaıdy Almaty-akshamy.kz
Orta bilim berý salasyndaǵy basty mindet – oqý baǵdarlamalaryn jańartý. Ásirese, muǵalimder baǵdarlamanyń keıbir tustaryn jóndeý keregin aıtyp júr. Ony sarapshylar da kótergen bolatyn. Bul syn oryndy. Baǵdarlamalardyń kemshilikterin túzeý kerek. Bul – aýqymdy, kúrdeli, mańyzdy jumys. Onymen aınalysatyn jumys toby quryldy. Olar shtattyq rejımde jumys isteýleri kerek. Onlaın formatta onyń tıimdiligi joǵary bolmaıdy, - dedi BǴM basshysy.
Mınıstrdiń sózinshe, jumys tobynyń quramyna ádiskerler, eldiń úzdik muǵalimderi, ǵalymdar, sarapshylar men mamandar tartylýy kerek.
- Oqý maqsattary tym kúrdeli, qaıtalaýǵa ýaqyt az, jas ereksheligi turǵysynan erte berilgen taqyryptarǵa qatysty syn-pikirler kópten beri aıtylyp júr. Sol sebepti osy baǵyt boıynsha jumys isteýimiz kerek. Bul baǵdarlamalar 2015 jyly bekitilip, oǵan 2016 jyldan 2021 jylǵa deıin mektepter kezeń-kezeńimen kóshti. Árıne, orta jolda toqtatyp qoıyp, oǵan ózgerister engizýge de bolmaıdy. Endi olardyń tıimdi de, tıimsiz jaqtaryn baıqaǵan soń keshendi jumysty júrgizýimiz qajet, - dep atap ótti Asqat Aımaǵambetov apparat jınalysynda.
Bas ustaz atap ótkendeı, tıptik oqý baǵdarlamalaryn jańartqannan keıin tıptik oqý josparlary boıynsha da jumys júrgiziledi.