Mańǵystaý oblystyq densaýlyq saqtaý basqarmasynyń málimetinshe, Embraer 190 ushaǵynyń apat ornyna 22 jedel járdem brıgadasy men apat medısınasy ortalyǵynyń alty brıgadasy jiberildi, dep habarlaıdy aqshamnews.kz
Basqarmanyń habarlaýynsha, Ázerbaıjan áýe kompanıasyna tıesili ushaqta balon jarylǵan.
"Oblystyq kópbeıindi aýrýhanada 30 hırýrgıalyq jáne travmatologıalyq tósek, sondaı-aq 10 reanımasıalyq tósek daıyndaldy. Oblystyq balalar aýrýhanasy 20 tósek pen 10 reanımasıalyq oryn daıyndady," — dep habarlady oblystyq densaýlyq saqtaý basqarmasy.
Medısınalyq mekemelerge 14 adam jetkizildi, onyń beseýi aýyr halde, olar reanımasıaǵa jatqyzyldy. 11 jastaǵy bala qabyldaý bóliminde tekserilýde. Sonymen qatar, 16 jastaǵy jasóspirim de aýrýhanaǵa jetkizilýde.