Bul týyndy 6-10 jas aralyǵyndaǵy balalarǵa arnalǵan.
Komıks eýropalyq tájirıbe negizinde Qanat Saharıanyń prodúserligimen jaryqqa shyqty, dep habarlaıdy Almaty-akshamy.kz.
Onda búldirshinderdiń sıfrlyq saýattylyǵyn arttyrýǵa, ınternettegi qaýipsizdik erejelerin úıretýge mańyz berilipti. Balǵyndarǵa onlaın ortada qaýipsizdikti úıretý úshin komıkske Qaısar esimdi keıipker engizilgen. Ol sýper qaharman keıpinde balalarǵa kıberbýllıngke qarsy turýǵa, aqparatty durys taldaýǵa kómektesedi.
"Áýelde biz balalarǵa ınternettegi qaýipsizdikti úıretýdi beınesabaqtar arqyly júrgizýdi oıǵa aldyq. Taǵy birneshe nusqa boldy. Saraptaı kele, komıks janryna toqtadyq. Birinshiden, komıkske balalardyń qyzyǵýshylyǵy joǵary. Ony qabyldaý da jeńil bolady. Aldaǵy ýaqytta áleýmettik jeliler men saıttar arqyly komıksterdiń qoldanys aıasyn keńeıtý josparymyz bar", - dedi QR Prezıdenti janyndaǵy Ulttyq Quryltaı múshesi Qanat Saharıa.
Komıkstiń senarıin jazyp, sýretin salǵan otandyq jas ári talantty avtorlar Mádına Tájbaǵambetova men Bek-Ata Danıal. Aıta ketý kerek, týyndyny qurastyrýǵa Eýropalyq Odaqtyń Qazaqstandaǵy ókildigi qoldaý bildirgen. Eýropalyq komısıa byltyr balalarǵa arnalǵan sıfrlyq qyzmetterdi jaqsartýdyń jáne ár balanyń ınternette qorǵalýyn qamtamasyz etýdiń jańa strategıasyn qabyldaǵan. Búgingi tanystyrylym - atalǵan baǵdarlama aıasynda júzege asqan jumystardyń biri.