QR eńbek sińirgen qaıratkeri Amantaı Berǵalıev №178 mektep aýmaǵynda ornalasqan, ózi tirkelgen saılaý ýchaskesine nemeresimen birge keldi, -dep habarlaıdy almaty-akshamy.kz
«Biz kirip kelgende, munda merekelik atmosfera, mýzyka oınap turdy. Jalpy, aýa-raıy da Qazaqstan úshin osyndaı mańyzdy kúnde bizge syılyq jasaǵan sıaqty. Kún de búgin shýaǵyn molynan tógip tur. Men nemeremmen birge keldim. Ol áli daýys bere almaıdy, 6-synypta oqıdy. Biraq kishkentaı bolsa da, eliniń tarıhyna jáne Qazaqstanda bolyp jatqan túrli oqıǵalarǵa degen qyzyǵýshylyǵy óte joǵary. Men, árıne, nemeremniń bul sergektigin, jaqsyny bilmekke degen qushtarlyǵyn árkez qoldaýǵa daıynmyn. Biz óskeleń urpaqqa úlgi bolýymyz kerek. Nemerem meniń saılaýǵa baratynymdy bilgende, menimen barǵysy keletinin aıtty. Munyń bári oǵan óte qyzyqty. Ol da – bolashaq saılaýshy ǵoı», – dedi Qazaqstannyń eńbek sińirgen qaıratkeri.
Amantaı Berǵalıev qazirgi saılaýdyń el úshin mańyzy zor bolatynyna senimdi.
«Májilis pen máslıhattar depýtattaryn saılaý – mańyzdy kezeń. Búgin biz búletenge belgi soǵyp qana qoımaı, senetin adamdarymyzdy tańdaımyz. Óıtkeni olar bizdiń talap-tilegimizdi bılik organdarynda jetkizýshiler. Árbir qazaqstandyq úshin mańyzdy bolyp tabylatyn máselelerdi sheshý joldaryn usynýshylar dep bilemin. Iá, bul – eldiń bolashaǵy sheshiletin aıtýly kún. Úıge qaıtyp bara jatqanda, tańerteń qala kóshelerinde ketip bara jatqan adamdarǵa nazar aýdardym. Bári qýanyshty bolyp kórindi. Olardyń daýys berýge bara jatqanyna da senimdi boldym. Bizdiń almatylyqtardyń saılaýdyń jalań naýqan emes, eldiń, qoǵamnyń júgin arqalaıtyn azamattarǵa múmkindik berý kózi ekenin túsinip keledi dep oılaımyn», – deıdi Amantaı Berǵalıev.