«ALTYN KÚZ» AISHYQTARY

Bostandyq aýdanyndaǵy №90 bóbekjaı-balabaqshada bolmysy da, mazmuny da erekshe, ashyq aspan astynda ótken merekelik baǵdarlama Respýblıka kúni men Altyn kúz merekesine oraılastyrylyp, erekshe formatta uıymdastyryldy. 
Sary kúzdiń berekesin beınelegen sahnalyq kórinister, jomart kúzdiń ónimderin jarnamalaǵan jármeńke deısiz be, áıteýir naǵyz mereke kórigin qyzdyrǵan kesh otanshyldyq rýh pen jylýlyqqa, meıirimge toly boldy.
Balabaqsha aýlasy kúzdiń altyn túsindeı keıipke engen. Ulttyq kıim kıgen kishkentaı balǵyndar qoldaryna jalaýsha ustap, merekeni kóńildi ánmen bastady. Kúzgi japyraqtar, jemister men kókónisterden jasalǵan kompozısıalar – barlyǵy jınalǵan qaýymnyń kóńilin kóterip, merekelik kóńil kúı syılady. Ásirese, balabaqshanyń kireberisinde qazaqtyń oıý-órnegimen kómkerilgen banner kózge alystan túsedi. Mundaǵy aıshyqty áriptermen jazylǵan «Táýelsiz eldiń balalary – bolashaqtyń úmiti!» degen jazý alystan kózge túsedi. 
Atalmysh is-sharanyń negizgi bóligi Respýblıka kúnine arnalǵandyqtan, árbir top ózderi daıyndaǵan shaǵyn konserttik baǵdarlamasyn usyndy. Máselen, balaqaılar Otan, el men jer tarıhy týraly ánder shyrqap, elimizdiń rámizderin tanystyrdy. Búldirshinderdiń Tý, Eltańba, Ánuran týraly sahnalyq qoıylymy sátti shyqty. 
–  Balaqaılar Otanǵa degen qurmetterin  óleń men oıyn arqyly qabyldaıdy. Al Respýblıka kúni merekesi – el tarıhy men qundylyqtaryn balanyń tilimen jetkizýdiń eń áserli tásili, – dedi balabaqsha meńgerýshisi Gúlimjan Jaılaýbeva .
 Merekeniń ekinshi bóligi – dástúrli «Altyn kúz» kórmesine arnaldy. Bul kúni árbir top ózderiniń shyǵarmashylyq buryshtaryn usyndy. Kókónister men jemisterden jasalǵan erekshe kompozısıalar, tabıǵı materıaldardan jasalǵan kıim úlgileri, japyraqtarmen bezendirilgen qolóner buıymdary balalardyń sheksiz qıalyn kórsetti. «Kúz hanshaıymy» baıqaýy da erekshe áser qaldyrdy. Balalar kúz taqyrybynda óleń oqyp, án shyrqady. Jemis-jıdekter men japyraqtardan tigilgen kıim úlgileri kórermender tarapynan úlken qoshemetke ıe boldy.