Zamanyna qaraı sporttyń keı túri de sánge aınalyp, damyp keledi. Almatylyq jastar arasynda ýrbanıstik sporttyń 10 túri tanymal.
Almaty elimizde mádenıet salasynda ǵana emes, sport salasynda da basty trendsetterge aınaldy. Ońtústik astanada jyl saıyn Qazaqstan úshin jańa sport túrleri paıda bolyp, qarqyndy damyp kele jatyr. Olardyń kóbi qalanyń turmysyna ábden enip aldy, dep habarlaıdy Almaty-akshamy.kz.
Nazarlaryńyzǵa Olympic.kz saıty tizimdegen tanymal sport túrlerin usynamyz.
Ýrbanıstik jáne ekstremaldy sport túrlerin jaqsy kóretin jandar úshin bir-birimen aqshalaı syılyqtar úshin saıysqa múmkindik bar. Sondaı alańdardyń biri — Almaty Urban Fest. Bıyl is-sharanyń baǵdarlamasyna 10 sport túri enip, 1000-nan astam qatysýshynyń basyn qosty.
Basketbol 3h3 – Halyqaralyq olımpıada komıtetiniń júrgizgen zertteýi boıynsha qalalardaǵy eń tanymal sport túri. 2017 jyly Olımpıada baǵdarlamasyna engizilip, alǵash ret Tokıo Olımpıadasynda tanystyryldy. Klasıkalyq basketbolmen salystyrǵanda sporttyń bul túrinde ár komandada 3 adam oınaıdy. Oıyn 10 mınýtqa nemese taraptardyń biri 21 upaı jınamaǵanǵa deıin sozylady.
Strıt vork-aýt – 2000 jyldardyń basynda AQSH-tyń kedeı aýdandarynda taralǵan bul baǵytty jáı kóshe gımnastıkasy dep qaramaı, sport sýbmádenıeti deýge bolady. Vorkaýttyń damýyna ınternet úlken áser etti. Kóshe jattyǵýlarynyń vıdeosy jastar arasynda úlken qyzyǵýshylyqty týdyryp, keıin Qazaqstanǵa da jetti. Búginde elimizdiń ár qalasynda arnaıy vork-aýt jattyǵýlaryna arnalǵan alańdardy kezdestirýge bolady.
Armrestlıng – barsha álemde keń tanylǵan sport túrleriniń biri. Olımpıada baǵdarlamasyna enbegen. Alaıda qarapaıymdylyǵyna qaramastan qatysýshylar men kórermenderdiń arasynda úlken qyzyǵýshylyqty oıatady.
Kóshe bıleri – bı stýdıalarynan bólek qalyptasqan bı stıli. Bıdiń basqa baǵyttarynyń kóptegen elementterin biriktiredi jáne kóp jaǵdaıda ımprovızasıaǵa júginedi. Almatylyqtardyń arasynda sporttyń bul túri óte tanymal. Apta saıyn kóshe bıshileri óz sheberlikterin kórsetý úshin ártúrli alańdarda jınalady. Sońǵy jyldary Tik-Tok qosymshasynyń arqasynda bul baǵyt qaıta gúldene bastady.
Agressıvti rolıkter, kık-skýter, skeıtbordıng – rolık, skýter jáne skeıtbordty ekstremaldy syrǵanaý dep aıtýǵa bolady. Syrǵanaýdyń negizgi elementteri – sekirý jáne taıǵanaý. Olarǵa áýede akrobatıkalyq trúkterdi qosýǵa bolady. Ońtústik astananyń jyly klımaty men jer bederiniń (tómen túsetin jáne joǵary kóteriletin) yńǵaıly bolýyna sáıkes almatylyq jastar arasynda keń taralǵan. Qazaqstannyń ózge qalalarynda da sporttyń bul túrine qyzyǵýshylyq artyp keledi. Sol sebepti jańa skeıt-saıabaqtary men skeıt-joldary salyna bastady.
BMX – velosporttyń eń tartymdy ári ekstremaldy túri. Arnaıy velosıpedte sekirip, ártúrli trúkter jasaýǵa bolady. Sporttyń bul túri de Qazaqstanda turaqty damyp keledi. Elimizdiń túkpir-túkpirinde BMX janashyrlary bar ekenin aıta ketken jón.
Parkýr – sekirý elementterin qoldana otyryp, kedergilerden jyldamdyqpen ótý. Strıt vork-aýt sıaqty sport túrine qaraǵanda sýbmádenıetke jaqyndaý. Parkýrdyń maqsaty – ártúrli kedergilerden ótip, jyldam aýysý. Alǵash ret Almaty Urban Fest baǵdarlamasyna engizildi.
Kıbersport (Dota 2) – sporttyń bul túrin ýrbanıstik dep aıtý qıyn. Alaıda buqaralyq jaǵynan jastar arasynda óte tanymal bolǵandyqtan Almaty Urban Fest baǵdarlamasyna qosyldy. Kópshilik oınaıtyn Dota 2 kompúter oıyny 2013 jyly shyqqanyna qaramastan, araǵa 10 jyl salyp áli de mańyzyn joǵaltpaı, qyzyǵýshylyq azaımady. Bizdiń elimizde 2018 jyldan bastap resmı sport túrine aınaldy. Al otandyq 5 kıbersportshy eýropalyq aımaqtyń úzdik ondyǵyna enedi.
Ýrbanıstik sport saıystary erekshe jaǵdaıdy jáne qomaqty qarajatty talap etpeıdi. Sonyń arqasynda jyldam buqaralyq sport túrine aınalyp bara jatyr. Azamattar bos ýaqytyn tegin ári sapaly ótkize alady. Almaty Urban Fest syndy is-sharalar Qazaqstanda qalalyq sport túrlerin keńinen nasıhattaıdy. Sonymen qatar jastardy salaýatty ómir saltyn saqtaýǵa shaqyrady.
Aıta keteıik, grand-fınal saıystary 17 qyrkúıekte saǵat 10:00-de «Almaty Arena» sport kesheninde bastalady. Fınal tartystary aıaqtalǵan soń 18:30-de jeńimpazdar men júldegerlerde marapattaý rásimi ótedi. Kórermender men qatysýshylardy 20:00-de merekelik baǵdarlama kútedi.
