Qala ákimi Baqytjan Saǵyntaevtyń tapsyrmasy boıynsha Óńirlik komısıa shaǵyn jáne orta bıznes sýbektilerine keltirilgen zalal somasyn anyqtaý boıynsha jumysty jalǵastyrýda, dep habarlaıdy Almaty-akshamy.kz
Búgin alǵashqy eki kásipkerge tártipsizdik kezinde keltirilgen zalal úshin ótemaqy tólendi. Aleksandr Tkachenko «Mobılka» SÚ uıaly telefondaryn satty. Ózgelerdiki sıaqty onyń býtıgi de tonaldy jáne qaraqshylar is júzinde joıyp jiberdi. Nátıjesinde kásipker 3,2 mln teńge shyǵynǵa ushyrady. A.Tkachenko barlyq qajetti qujattardy rásimdegennen keıin, oǵan tolyq kólemde qarajat aýdaryldy.
Basqa kásipker Arkenjan Mırzabaev «Azıa park» SOSO jáne «Maksıma» SOSO 2 býtıkti jalǵa alyp, balalar kıimin satty. Tártipsizdiktiń saldarynan onyń bıznesine 1,8 mln teńge zalal keltirildi. Oǵan da ótemaqy qarajaty aýdaryldy.
Aldyn ala málimetter boıynsha, Almatyda tártipsizdik pen tonaý saldarynan 1581 kásipkerlik sýbektisi zardap shekken. Shyǵyn somasy 45,6 mlrd teńgeni quraıdy. Zalal somasyn aıqyndaý jónindegi óńirlik komısıa zardap shekken obektiler boıynsha, onyń ishinde jergilikti jerlerge shyǵa otyryp, derekterdi jınaýdy jalǵastyrady.
Qala ákimi B. Saǵyntaevtyń tapsyrmasyna sáıkes, qala SHOB-ke birneshe baǵyt boıynsha qarjylyq jáne qarjylyq emes qoldaý kórsetedi. Osylaısha, zardap shekken bıznes sýbektileri jylý, gaz, sýmen jabdyqtaý jáne káriz boıynsha 3 aıǵa komýnaldyq shyǵyndardan bosatylady. Sonymen qatar, qala menshigindegi úı-jaılardy jalǵa alatyn kásipkerler 6 aıǵa jalgerlik tólemnen bosatylady.
Qosymsha Almaty Business-2025 qalalyq baǵdarlamasy boıynsha kásipkerlerge aınalym qarjysynn tolyqtyrýǵa 10 mln teńgege deıin jyldyq 2%-ben 12 aıǵa kepilmen nemese «Almaty» ÁKK ishinara kepildigimen jeńildikti zaem beriledi.
Sonymen qatar, zardap shekken kásipkerlerge negizgi qaryzdy óteý merzimin keıinge shegerip, «Almaty fınans» JSHS men mıkroqarjy uıymdarynda 180 kúnge deıingi merzimge aıyppuldar men ósimpuldardan bosatady. Nesıeleýdiń eń uzaq merzimi jarty jylǵa, qoldanystaǵy 7 jyldan 7,5 jylǵa deıin ulǵaıtyldy, kepilsiz nesıeleý boıynsha mólsherlemeler jyldyq 12%-dan 9%-ǵa deıin tómendetildi.