Abaı atyndaǵy Qazaq ulttyq opera jáne balet teatrynda saltanatty konsert boldy.
Almatyda halyqaralyq TÚRKSOI uıymnyń 30 jyldyǵyna oraı qatysýshy elder mınıstrleriniń kezdesýi ótti, dep habarlaıdy Almaty-akshamy.kz
Qazaqstanǵa jumys saparymen Ózbekstannyń Mádenıet mınıstri Ozodbek Nazarbekov, sondaı - aq Túrkıa, Ázirbaıjan jáne Qyrǵyzstan Mádenıet mınıstrleriniń orynbasarlary Serdar Cham, Mýrad Gýseınov pen Qaırat Imanalıev keldi. İs-shara TÚRKSOI Bas hatshysy, Qyrǵyzstannyń Halyq jazýshysy Sultan Raevty II dárejeli «Dostyq» ordenimen marapattaýdan bastaldy. El Prezıdenti Qasym-Jomart Toqaev tıisti Jarlyqqa qol qoıdy. Konserttik baǵdarlama aıasynda sahnada Qazaqstan men basqa da TÚRKSOI elderiniń artıseri óner kórsetti. Kórermender arasynda elimizdiń kórnekti óner jáne mádenıet qaıratkerleri, zıaly qaýym ókilderi boldy. Sondaı-aq, túrki elderiniń ulttyq kıimderiniń taqyryptyq fotokórmesi men defılesi ótti. Al teatr aýlasynda qazaqstandyq qolónershilerdiń kórmesi uıymdastyryldy.
«TÚRKSOIDYŃ 30 jyldyǵy-búkil túrki álemi úshin mańyzdy oqıǵa. Sondyqtan, eń aldymen, Almatyǵa osy ataýly kúndi merekeleýge kelgen áriptesterime alǵys aıtamyn. Osy ýaqyt ishinde biz baýyrlas halyqtarmen mádenı jáne rýhanı baılanystardy nyǵaıttyq, aýqymdy jobalardy júzege asyrdyq, tájirıbe jáne bilim almastyq. Bul úderisterdiń bastalýy Qazaqstanda qalanǵany biz úshin erekshe mańyzdy. Bizdiń ortaq kúsh-jigerimizben TÚRKSOI odan ári damıtynyna senimdimin. Qazaqstan-TÚRKSOIDYŃ belsendi qatysýshysy. Elimizdiń bastamasy boıynsha 2023 jyl uıym deńgeıinde Temirbek Júrgenov jyly bolyp jarıalandy. Uly qaıratkerdiń 125 jyldyǵyna oraı TÚRKSOI elderinde júzden astam túrli is-sharalar ótedi. Atap aıtqanda, konsertter, ǵylymı — tájirıbelik konferensıalar jáne kitaptardyń tusaýkeserleri osy kóktemde Almatyda bastaldy», - dedi QR Mádenıet jáne sport mınıstri Asqat Oralov.
«Qazaqstan Respýblıkasynyń Prezıdentine maǵan kórsetken qurmeti úshin alǵys aıtamyn. Qazaq jeri túrki mádenıeti úshin kóptegen mańyzdy tulǵalardyń otany boldy. Jahandanýdyń qazirgi dáýirinde týǵan mádenıetti saqtaýdyń mańyzdylyǵy burynǵydan da ózekti. Sondyqtan TÚRKSOI elderiniń barlyǵy osy ortaq mısıa úshin birlesip jumys isteıtin bolady», — dedi Sultan Raev.
Esterińizge sala keteıik, aýqymdy mádenı baǵdarlama 7 maýsymda bastaldy. QR Ortalyq memlekettik mýzeıinde «Myńjyldyq órkenıet tarıhy» kórmesi uıymdastyryldy. Kórmeni QR Mádenıet jáne sport vıse-mınıstri Erjan Erkinbaev pen TÚRKSOI Bas hatshysy Sultan Raev ashty. Kelýshilerdiń nazaryna áıgili «Altyn adam» jáne júzden astam kóne jádiger usynyldy. Kelesi kúni Á.Qasteev atyndaǵy QR Memlekettik óner mýzeıinde «Biz birgemiz» atty kórme ashyldy. Onda mýzeı qorynan otandyq sýretshilerdiń 40 týyndysy, sondaı-aq Túrkistannan ákelingen 30 sýret usynyldy. Al QR Ulttyq kitaphanasynda sol kúni «Túrki áleminiń birligi» atty kitap kórmesi bastaldy. Onda kitaphana qorynan sırek kezdesetin kitaptar men qoljazbalar: Fırdoýsıdiń «Shahname» jáne «Nasabnamnyń» eńbekteri, Qoja Ahmet Iasaýı, Baqyrǵanı, Álisher Naýaı, Sopy Allaıardyń ejelgi eńbekteri, Abaıdyń alǵashqy baspa kitaby, Ahmet Baıtursynov, Maǵjan Jumabaev, Júsipbek Aımaýytovtyń eńbekteri, sondaı-aq túrkiler tarıhy boıynsha kitap materıaldary, qujattar usynyldy TÚRKSOI týraly, HH ǵasyrdyń birinshi jartysyndaǵy merzimdi basylymdar, túrki halyqtarynyń mýzykalyq shyǵarmalary bar vınıldik gramplastınkalar kópshilikke usynyldy.
TÚRKSOI - túrki halyqtarynyń ortaq materıaldyq jáne mádenı eskertkishterin saqtaý, damytý jáne bolashaq urpaqqa jetkizý maqsatyn kózdeıtin halyqaralyq uıym. 1993 jyly Almatyda qurylǵan. TÚRKSOI quramyna 6 memleket kiredi: Qazaqstan, Túrkıa, Qyrǵyzstan, Ázirbaıjan, Túrikmenstan jáne Ózbekstan.