1 069 birlikke deıin jetkizý josparlanyp otyr.
Osy jyldyń sońyna deıin Almatyda "Sergek" kameralarynyń sany 122-ge arttyryp, 1 069 birlikke deıin jetkiziledi. Bul týrady qala ákimi Erbolat Dosaev Almaly aýdanynyń halqymen kezdesý barysynda aıtty, dep habarlaıdy Almaty-akshamy.kz.
Qala ákiminiń aıtýynsha, shahardyń damýynda qoǵamdyq qaýipsizdikti qamtamasyz etý máselesi ózekti bolyp tabylady. Ol úshin aldyn alý sharalary qabyldanady.
«2022 jyldyń sońyna deıin aýdanda "Sergek" kameralarynyń sanyn 122-ge arttyryp, 1 069 birlikke deıin jetkizý josparlanyp otyr. Jappaı shoǵyrlaný oryndary boıynsha qosymsha 541 beınekamera ornatylady, onyń ishinde 200-i aýlada,118-i saıabaqtarda/alańdarda jáne 223-i qıylystarda. Bul rette, búdjet esebinen buryn aýlalarda kameralar ornatylmaǵan. Qaýipsizdik máselesiniń ekinshi jaǵy - jaıly kóshe ınfraqurylymyn qurý. "Vision Zero" aıasynda aýdannyń 6 kóshesin qaıta qurý júrgizilýde, onyń negizgi maqsaty joldardaǵy ólim-jitimdi azaıtý bolyp tabylady. Sondaı-aq, aǵymdaǵy jyly aıaqtalatyn baǵdarshamdardyń qurylysy esebinen 6 ýchaskedegi kólik aǵyny retteletin bolady», - dedi Erbolat Dosaev.
Qala basshysynyń aıtýynsha, jastar men qalamyzdyń bolashaǵy úshin esirtki erekshe qaýip tóndiredi. Jastar arasynda nashaqorlyqtyń aldyn alý úshin ótken jyldyń qazan aıynda qoǵam ókilderimen jáne esirtki qylmysyna qarsy is-qımyl basqarmasymen birge «NarkoStop» jobasy bastalǵan.
Joba memlekettik, qoǵamdyq jáne jergilikti deńgeıdegi sharalar kesheni bolyp tabylady.
«Búgingi tańda jobaǵa qatysýshylar, ıaǵnı 400 volonterdan quralǵan komanda 80 myńnan astam esirtki jarnamasyn boıap óshirdi. Polısıa qyzmetkerleri joba aqparaty boıynsha 24 sıntetıkalyq esirtki taratýshyny ustady. Meniń tapsyrmam boıynsha joba qalanyń basqa aýdandarynda da qaıtalanýda»,- dedi qala ákimi.