Qar shyǵarý jumystarynyń sapasyn arttyrý úshin Almatyda jol boıyndaǵy bollardtar alynyp jatyr
3 qarashadan bastap qalalyq Jol qozǵalysyn jáne jolaýshylar tasymalyn uıymdastyrý basqarmasy velojolaqtardyń boıyna ornatylǵan sıgnaldyq bollardtardy alý jumystaryn bastady, - dep habarlaıdy Aqshamnews.kz.
Bul joldardy qar men muzdan kedergisiz tazalaý jáne kólik qozǵalysynyń qaýipsizdigin qamtamasyz etý maqsatynda qolǵa alynǵan.
Ýaqytsha qorshaýdy alyp tastaý komýnaldyq qyzmetterge mehanıkalyq tazalaý jumystaryn tıimdi atqarýǵa, jol jıeginde qar úıindileriniń paıda bolýyn boldyrmaýǵa jáne qozǵalysqa qatysýshylar úshin yńǵaıly ári qaýipsiz jaǵdaı jasaýǵa múmkindik beredi.
Sonymen qatar, veloınfraqurylym saqtalyp, qyzmetin jol qozǵalysy qaýipsizdigi talaptary men standarttaryna sáıkes jalǵastyra beredi.
Osyǵan baılanysty, Jol qozǵalysyn uıymdastyrý basqarmasy júrgizýshiler men júrginshilerge Qazaqstan Respýblıkasynyń jol qozǵalysy erejelerin, sondaı-aq jol belgileri men tańbalaryn qatań saqtaýdy eskertedi. Tártiptiń oryndalýyna quzyrly organdar tarapynan baqylaý júrgiziledi.
Bollardtardy alý jumystary qysqa merzimde aıaqtalady. Qalanyń qyzmetteri qysqy kezeńge arnalǵan daıyndyq sharalaryn jalǵastyryp, barlyq jol qozǵalysy qatysýshylary úshin qaýipsiz ári jaıly jaǵdaı jasaýǵa kúsh salady.