Mýralǵa arnalǵan taqyryp kezdeısoq tańdalmaǵan.
Almatyda kóp qabatty turǵyn úılerdiń birine qutqarýshylardyń qurmetine mýral salyndy, dep habarlaıdy Almaty-akshamy.kz TJD baspasóz qyzmetine silteme jasap.
Art-nysan «Aınabulaq» shaǵynaýdanyndaǵy toǵyz qabatty úıdiń qasbetinde paıda boldy. Tótenshe jaǵdaılar departamentiniń málimetinshe, mýralǵa arnalǵan taqyryp kezdeısoq tańdalmaǵan. Qutqarýshylar árqashan aldyńǵy qatarda, óz ómirlerin qaterge tigedi. Sondyqtan da el qurmetine bólengen mamandyq. Qabyrǵada kishkentaı qyzdy jalynnan alyp shyqqan órt sóndirýshi – qutqarýshy beınelengen.
«Aıta ketý kerek, uqsas beıneler, músinder - tótenshe jaǵdaılardy joıýǵa da, olardyń aldyn alýǵa da qatysqan barlyq qutqarýshylardyń ujymdyq beınesi»,- dep habarlady TJD baspasóz qyzmetinen.
«Mýraldy alystan kórýge bolady, onda tek órt sóndirýshiniń beınesi ǵana emes sonymen qatar TJ bolǵan jaǵdaıda habarlasý qajet – «112» nomeri beınelengen. Mýraldyń maqsaty- turǵyndardyń nazaryn órt qaýipsizdigi erejelerin saqtaýǵa shaqyrý», - dep atap ótti Jetysý TJB bastyǵy Arman Mákenov.
Taqyryptyq mýral halyq arasynda órt-profılaktıkalyq jumys aıasynda Jetisý aýdany ákimi apparatynyń qoldaýymen jáne aýdandyq Tótenshe jaǵdaılar basqarmasymen birlesip salyndy.