Almatyda qazanda Qarttar aılyǵy men Respýblıka kúnine oraı merekelik is-sharalar ótti.
Aıtýly oqıǵalarǵa qatysty qalada barlyǵy 25 is-shara ótkizilip, oǵan 2500 adam qatysty. Bar ǵumyryn eldi damytýǵa, jastardy tárbıeleýge jáne otbasy qundylyqtaryn nyǵaıtýǵa jumsaǵan jandar úshin arnaıy 10 aýqymdy is-shara uıymdastyryldy, - dep habarlaıdy Aqshamnews.kz.
2025 jyly 30 qyrkúıek pen 1 qazan aralyǵynda Almatynyń Jumyspen qamtý jáne áleýmettik baǵdarlamalar basqarmasynyń «Belsendi uzaq ómir súrý ortalyǵy» mekemesi «Belsendi uzaq ómir: tájirıbe jáne múmkindik» atty halyqaralyq forým ótkizdi.
Forýmnyń maqsaty - belsendi uzaq ómir súrýdi qamtamasyz etý jolynda tájirıbe almasý, qarttardy qoldaýdyń ınovasıalyq ádisteri men áleýmettik baǵdarlamalardy keńinen talqylaý.
Atalǵan is-shara aǵa býyndy áleýmettik qoldaý, ozyq tájirıbelerdi engizý men óńiraralyq jáne halyqaralyq yntymaqtastyqty nyǵaıtý máselelerin talqylaýǵa arnalǵan halyqaralyq alańǵa aınaldy.
Forýmǵa QR Eńbek jáne halyqty áleýmettik qorǵaý mınıstrliginiń, Almaty qalasy Jumyspen qamtý jáne áleýmettik baǵdarlamalar basqarmasynyń, «Belsendi uzaq ómir súrý ortalyqtarynyń» basqa óńirlerden kelgen ókilderi, sheteldik qonaqtar men qoǵamdyq birlestikter qatysty. Forým baǵdarlamasy aıasynda ál-Farabı atyndaǵy QazUÝ-de paneldik talqylaý, budan ózge, sándik-qoldanbaly óner jáne keskindeme kórmesi, sheberdiń dáristeri, shyǵarmashylyq qoıylymdar, Almaty men Esik qalasyndaǵy mýzeıler men kórikti jerlerge ekskýrsıa uıymdastyryldy.
10 qazanda Almatynyń Jumyspen qamtý jáne áleýmettik baǵdarlamalar basqarmasynyń uıymdastyrǵan saltanatty is-shara ótti. Oǵan 150-ge jýyq aǵa býyn ókilderi, eńbek ardagerleri, belsendiler qatysty. Baǵdarlama aıasynda Alǵys hat, estelik syılyqtar tabystalyp, óner juldyzdarynyń qatysqan konsert qoıyldy.
Dál osy kúni «Belsendi uzaq ómir súrý ortalyǵynyń» Medeý aýdandyq bólimshesi «Qarttarym – asyl qazynam» atty poezıalyq kezdesý uıymdastyrdy. Kesh barysynda aýa býyn ókilderi men shyǵarmashylyq ujymdar avtorlyq óleń oqyp, mýzykalyq kompozısıa usyndy.
15 qazanda halyqaralyq semınar uıymdastyryldy, onyń barysynda BUU jáne Ortalyq Azıa óńiri elderiniń ókilderi Máýlenov kóshesi, 46a mekenjaıda ornalasqan «Belsendi uzaq ómir súrý ortalyǵyna» bardy. Qonaqtar ortalyq jumysymen tanysyp, shyǵarmashylyq kórmeni, konserttik baǵdarlamany tamashalady jáne qarttarmen jumys uıymdastyrý boıynsha tájirıbe almasty. Buǵan qosa, Medeý aýdany Ardagerler keńesiniń qoldaýymen uıymdastyrylǵan Halyqaralyq Qattar kúnine arnalǵan Oqýshylar saraıynda ótken konsertti de kórdi.
17 qazanda Art Galaxy Alma Ata galereıasynda «Bizdiń Qazaqstan» keskindeme jáne beıneleý óneri kórmesi saltanatty túrde ashyldy, munda qarttardyń 100-ge jýyq jumysy qoıyldy. Kórme 17 qarashaǵa deıin jalǵasady (Nazarbaev kóshesi, 223, «Alma-Ata» SOO).
22 qazanda «Belsendi uzaq ómir súrý ortalyǵynyń» ortalyq bólimshesinde «Órkende, qazaq halqy!» merekelik is-shara ótti. Oǵan zeınetkerler, qalanyń belsendi turǵyndary qatysty. İs-sharaǵa qatysqandar estelik aıtyp, kóterińki kóńil kúıde tarqasty.
Dál osy kúni Balýan Sholaq atyndaǵy Sport saraıynda Respýblıka kúnine arnalǵan shahmat festıvali ótti. Týrnırge almatynyń qart turǵyndary qatysty. Shahmat týrnıri egde jandarǵa umytylmas kóńil-kúı syılady.
24 qazanda «Belsendi uzaq ómir súrý ortalyǵynyń» Medeý bólimshesinde ótken «Jasa, Qazaqstan!» konserti merekelik is-sharalardy odan ári jalǵastyra tústi. Qart kisiler án aıtyp, ónerin ortaǵa saldy.
2025 jyly 31 qazanda «Konkordıa» stýdenttik teatrynyń ǵımaratynda Almatynyń «Belsendi uzaq ómir súrý ortalyǵy» mekemesi uıymdastyrǵan jyl saıynǵy dástúrli «Uzaq ómir súrý festıvali» ótti.
Festıvál Qarttar aılyǵynyń shaharda joǵary deńgeıde ótkenin aıshyqtaı tústi. Oǵan qalanyń barlyq aýdanynyń qarttary qatysyp, óner kórsetti. Dombyradan kúı tógilip, túrli shyǵarmashylyq qoıylymdar usynyldy.
Uıymdastyrlǵan is-sharalar memleket pen qoǵamnyń aǵa býyn ókilderine erekshe nazar aýdaratynyn, urpaqtar sabaqtastyǵy men birlik rýhyn nyǵaıta beretinin kórsetti.