Almaty qalasynyń ákimi Erbolat Dosaev senbide belgili memleket jáne qoǵam qaıratkeri, aqyn Kákimbek Salyqovtyń qurmetine memorıaldyq taqtanyń ashylý saltanatyna qatysty.
Eskertkish taqta Kákimbek Salyqov turǵan Ýálıhanov kóshesi, 137 úıdiń qasbetine ornatyldy. Saltanatty sharaǵa belgili qoǵam jáne mádenıet qaıratkerleri Oljas Súleımenov, Dýlat Isabekov, Jánibek Káribjanov, dıplomatıalyq korpýs, memlekettik organdar ókilderi, sondaı-aq aqynnyń qyzy Maıra Salyqova qatysty.
Erbolat Dosaev óz sózinde Kákimbek Salyqovty eske alýǵa arnalǵan memorıaldyq taqtanyń saltanatty ashylýy qalanyń rýhanı ómirindegi mańyzdy oqıǵa ekenin atap ótti.
"Qazaq poezıasynyń klassıgi atanǵan Kákimbek Salyqov memlekettik qyzmet pen ádebıetti birtutas úılestirdi.
Aqynnyń shyǵarmalary álemniń kóptegen tilderine aýdarylyp, óleńderine ánder jazylǵan. Ataqty "Jezkıigi" qazaq dalasyn dúr silkindirdi. Kákimbek Salyqov sonymen qatar kórkem aýdarma sheberi jáne ulttyq sana-sezimdi qalyptastyrýǵa baǵa jetpes úles qosqan biregeı tulǵa. Ol ulttyń maqtanyshy, óz eliniń naǵyz patrıoty boldy. Onyń qalamynan shyqqan shyǵarmalar qazaq ádebıetiniń altyn qoryna endi", - dep atap ótti qala ákimi.
Máskeý Tústi metaldar jáne altyn ınstıtýtyn bitirgennen keıin Kákimbek Salyqov kóptegen jyldar boıy shahtada jumys istep, sheberden Jezqazǵan taý-ken metalýrgıa kombınatynyń shahta bastyǵyna deıin jetti. Partıalyq jumysqa aýysqannan keıin Jezqazǵan qalalyq partıa komıtetiniń birinshi hatshysy, Qazaqstan Kompartıasy Jezqazǵan oblystyq komıtetiniń ekinshi hatshysy, KOKP OK ınspektory, Ózbekstan Kompartıasy Qaraqalpaq oblystyq komıtetiniń birinshi hatshysy qyzmetterin atqardy. Úsh ret Qazaq KSR Joǵarǵy Keńesiniń depýtaty bolyp saılandy. Lenın ordenimen, eki Eńbek Qyzyl Tý ordenimen, Halyqtar Dostyǵy ordenimen jáne kóptegen medaldarmen marapattalǵan.
Sondaı-aq, dál osy kúni Almatyda Bostandyq aýdanynyń «Nur Alataý» shaǵyn aýdanynda kórnekti aqynnyń qurmetine kóshe ashyldy.