Almaty qalasynyń ÓKQ brıfıńinde Almaty qalasy Sanıtarlyq-epıdemıologıalyq baqylaý departamenti basshysynyń orynbasary Ásel Qalyqova qyzylshaǵa, qyzamyqqa jáne parotıtke qarsy qosymsha jappaı ımmýndaýǵa jatatyn halyqtyń sanattary týraly aıtty, dep habarlaıdy Almaty-akshamy.kz.
«Qyzylshaǵa qarsy sanıtarıalyq-epıdemıaǵa qarsy jáne sanıtarıalyq-profılaktıkalyq is-sharalardy júrgizý týraly» Qazaqstan Respýblıkasy Bas memlekettik sanıtarıalyq dárigeriniń 01.11.2023 j. №7 Qaýlysyna sáıkes qyzylshaǵa, qyzamyqqa jáne parotıtke qarsy qosymsha jappaı ımmýndaý:
Balalarǵa 6 aıdan 10 aı 29 kúnge deıin,
qyzylshaǵa qarsy egý mártebesine qaramastan 2 jastan 4 jas 11 aı 29 kúnge deıin,
qyzylshaǵa qarsy profılaktıkalyq ımmýnızasıasy joq medısına qyzmetkerleri men densaýlyq saqtaý uıymdarynyń qyzmetkerlerine egilýi tıis.
Qalada 6 aıdan 10 aıǵa deıingi balalarǵa arnalǵan qyzylshaǵa qarsy vaksınanyń qaldyǵyn eskere otyryp, 10 qarashadan bastap ımmýndaý bastaldy jáne qyzylshamen syrqattanýshylyq boıynsha epıdemıologıalyq jaǵdaı turaqtanǵanǵa deıin jalǵasatyn bolady.
10-28 qarasha aralyǵynda qyzylshaǵa qarsy qosymsha ımmýndaýmen 5 757 bala qamtyldy. Buryn vaksınasıalanbaǵan 18 jasqa deıingi balalardy ımmýndaý 2023 jylǵy 5 jeltoqsannan bastap júrgiziledi.
Qyzylshaǵa qarsy josparly vaksınasıa eki ret júrgiziledi, birinshisi-1 jasta (12-15 aı), ekinshisi - 6 jasta, bul vaksınasıadan keıingi ımýnıtetti damytýǵa múmkindik beredi. Qyzylshaǵa qarsy vaksınanyń árbir dozasy balanyń ımýnıtetin kúsheıtedi.
Profılaktıkalyq egýler turǵylyqty jeri boıynsha aýmaqtyq emhanalardyń egý kabınetterinde júrgiziledi.
Ásel Qalyqova qyzylshany juqtyrýdyń aldyn alatyn jalǵyz tıimdi qural tek vaksınasıa ekenin atap ótti.
Qazaqstanda vaksınasıa júrgizý úshin DDU sertıfıkattaǵan jáne Qazaqstan Respýblıkasynda tirkelgen Úndistan (Serum Institute of India Ltd) óndirgen qyzylshaǵa, qyzamyqqa, epıdemıalyq parotıtke qarsy aralas vaksına qoldanylady.
Serum Institute of India Ltd vaksınasy álemniń 110-nan astam elinde, sonyń ishinde Eýropa elderinde qoldanylady.
Tirkeý kezeńinde qatań baqylaýdan basqa, Qazaqstanǵa ákelinetin vaksınalardyń árbir partıasy (árbir serıasy) qaýipsizdik pen sapaǵa qaıta baqylaýdan ótedi.
Qazirgi ýaqytta qalada tıisti kontıngentterdiń qyzylshasyna qarsy júrgizý jáne nysanaly toptaǵy balalardy josparly ımmýndaýdy jalǵastyrý úshin jetkilikti kólemde (29.11.2023 j.83 315 doza) qyzylshaǵa qarsy vaksına bar. Jeltoqsan aıynda 95 200 doza kóleminde qyzylshaǵa qarsy vaksına jetkiziledi dep kútilýde.