Almatylyqtar "Halyq qatysatyn búdjet" jobasyna belsendi qatysýda.
1 qyrkúıekten bastap ótinimderdi qabyldaý bastaldy. Alǵashqy kezdiń ózinde 430 jobalyq usynys kelip tústi, - dep habarlaıdy Aqshamnews.kz.
Qala turǵyndary kógaldandyrý, aýlalar men kóshelerdi abattandyrý, trotýarlar men aryqtardy jóndeý, qoǵamdyq keńistikterdi qurý jáne jaryqtandyrý, balalar alańqaıy men sport alańdaryn ornatý, sondaı-aq sanıtarlyq tártipti qamtamasyz etý boıynsha jobalardy usynýda.
Ótinimderdi qabyldaý 2025 jyldyń 30 qyrkúıegine deıin jalǵasady. Barlyq usynystardy saraptamalyq keńester men aýdan ákimdikteri qaraıtyn bolady. Daýys berý qorytyndysy boıynsha kóp qoldaýǵa ıe bolǵan jobalar Almatyda 2026 jyly júzege asyrylatyn bolady.
Ótinimderdi budget.open-almaty.kz portaly arqyly berýge bolady. Ol úshin jobanyń ataýy men sıpattamasyn, ornalasqan jeriniń mekenjaıyn, fotosýretin nemese eskızin, sondaı-aq shyǵyndar smetasyn kórsetý qajet.
Eske salsaq, jobalyq usynystar birqatar sharttarǵa sáıkes kelýi tıis:
· bir avtor—bir ótinim—bir nysan;
· aýdan aýmaǵyndaǵy jalpy paıdalaný nysany;
· jobanyń eń joǵary quny — 294,9 mln teńge.
Qajetti keńesti Almaty qalasynyń aýdandyq ákimdikterinen, sondaı-aq Open Almaty ákimdiginiń Qoǵamdyq qabyldaý bólmesinen 224 39 29 (ishki 203) telefony arqyly alýǵa bolady.