Almatyda Bek Air ushaǵynyń apatyna qatysty sot úkimi shyqty, - dep habarlaıdy Aqshamnews.kz tilshisi inform.kz-ke silteme jasap.
Sot marqum ushqyshtar Meıirjan Moldaqulov pen Marat Muratbaevty Qylmystyq kodeksiniń 344-babynyń 3-bóligi (áýe kóligin basqarý nemese paıdalaný kezinde qaýipsizdik qaǵıdalaryn buzý, árekettiń abaısyzdyqtan eki nemese odan da kóp adamnyń ólimine ákep soǵýy) boıynsha kináli tanydy. Olardyń ómirden ótýine baılanysty qylmystyq jaza taǵaıyndalǵan joq.
Sot jaryssózinde prokýror Aıdos Palmanov ushaq apatyna áýe kemesin basqarǵan ushqyshtar kináli ekenin aıtty.
Al jábirlenýshi taraptyń advokaty qaza tapqan ushqyshtardy aqtap, olardyń ornyna Almaty halyqaralyq áýejaıy men Azamattyq avıasıa komıteti qyzmetkerlerin jaýapqa tartýdy surady.
Sondaı-aq, ushqyshtardyń áıelderi taǵylǵan aıypqa narazylyq bildirdi.
Sot barysynda Bek Air áýe kompanıasynyń múlkine shekteý qoıdy.
Eske salaıyq, 2019 jylǵy 27 jeltoqsanda Almatydan Astana qalasyna ushyp shyqqan Bek Air kompanıasynyń ushaǵy radardan joǵalyp ketti. Keıin 95 jolaýshysy jáne 5 ekıpaj múshesi bar ushaqtyń apatqa ushyraǵany málim boldy.
Ushaq jerge qulaǵan soń syrǵanap baryp áýejaı aýmaǵyna jaqyn tustaǵy aýyl shetindegi eki qabatty úıge soǵylǵan. Saldarynan 12 adam qaza tapty. Osydan keıin Bek Air áýe kompanıasyna tıesili toǵyz Fokker-100 ushaǵynyń qyzmeti toqtatyldy.