Almaty polısıasy qala mektepteriniń dırektorlarymen balalar arasyndaǵy sýısıdtiń aldyn alý máselesin talqylady.
Jergilikti polısıa qyzmetiniń habarlaýynsha, buǵan deıin shahardyń Almaly, Alataý jáne Áýezov aýdandarynda jumys kezdesýleri ótken, dep habarlaıdy Almaty-akshamy.kz Polisia.kz-ke silteme jasap.
«Kún tártibinde balalardyń qaýipsizdigin qamtamasyz etý, atap aıtqanda, mektep oqýshylarynyń oqý barysynda qaýipsizdikterin qamtamasyz etý máseleleri qaraldy. Beınerolık kórsetý barysynda daǵdarys jaǵdaıynda oqýshylar men mektep qyzmetkerleriniń is-áreketiniń algorıtmi túsindirildi. Sonymen qatar, jalpy bilim berý uıymdarynyń basshylaryna kámeletke tolmaǵandar arasyndaǵy jedel jaǵdaı, mektep oqýshylary arasyndaǵy quqyqbuzýshylyqtyń, kámeletke tolmaǵandarǵa qarsy, onyń ishinde olardyń jynystyq qol suǵylmaýshylyqtaryna qarsy qylmystardyń, sondaı-aq balalardyń ózin-ózi qurtý áreketteriniń aldyn alý boıynsha júrgizilip jatqan jumystar týraly habardar etildi», – dep habarlady Almaty qalasy PD JPQB ıývenaldy polısıa bóliminiń bastyǵy Janna Shonjanova.
Aýtodestrýktıvti minez-qulyq – jańa qubylys emes. Jasóspirimderdiń aýtodestrýktıvti minez-qulqynyń belgileri kóbirek baıqalady, kóbinese bul uǵym sýısıdtik jáne ózin-ózi zaqymdaıtyn minez-qulyqty, keıde alkogól men nashaqorlyqqa táýeldilikti bildiredi. Polıseılerdiń aıtýynsha, balalardyń qaýipsizdigin qamtamasyz etý máselelerin barlyq múddeli memlekettik organdar men qoǵamnyń birlesken kúsh-jigeri arqyly ǵana sheshýge bolady.