Memleket basshysynyń 2022 jyldyń qarasha aıynda jáne aǵymdaǵy jyldyń tamyz aıynda berilgen tapsyrmalaryn oryndaý sheńberinde jaqsy nátıjelerge qol jetkizildi.
Bul týraly Almaty qalasy máslıhatynyń kezekten tys XIII sesıasynda Almaty ákiminiń orynbasary Asqar Ámrın baıandady, dep habarlaıdy Almaty-akshamy.kz.
Prezıdent Almaty qalasy turǵyndarynyń ómir súrý deńgeıin kóterýdi tapsyrdy. Buǵan ekonomıka men áleýmettik salany damytý, sapaly sýmen jabdyqtaý jáne yńǵaıly qoǵamdyq kólikti qamtamasyz etý, aýa sapasyn jaqsartý jáne taǵy basqa sharalar baǵyttalǵan.
Biz Almatynyń 2040 jylǵa deıingi jańa Bas josparyn, Almaty aglomerasıasyn damytýdyń Keshendi josparyn jedel qarap qabyldadyq. Sonymen qatar komýnaldyq qyzmetterge tarıfterdiń ósýin óteý úshin halyqtyń áleýmettik osal toptaryna jatatyn azamattarǵa arnalǵan tólemderdi bekittik, jáne aldaǵy úsh jyldyq kezeńdegi qalanyń áleýmettik baǵyttalǵan búdjetin qabyldadyq.
Búgin sizdiń qaraýyńyzǵa engizilgen Almaty qalasynyń dızaın-kody atalǵan mańyzdy qujattar qataryna qosylýda. Ol Máslıhattyń qurylys, sáýlet, ýrbanıstıka jáne jer qatynastary jónindegi komısıa múshelerimen qaralyp pysyqtaldy.
Almatynyń dızaın-kody – qalalyq ortany qalyptastyrý boıynsha erejeler men qaǵıdalardyń jıyntyǵy. Ol qala turǵyndary úshin qolaıly úılesimdi megapolıs qurýǵa baǵyttalǵan.
Dızaın-kod sheńberinde biz eki maqsatqa qol jetkizemiz. Birinshi maqsat – Almatynyń tanymal tarıhı kelbetin saqtaý, ekinshi –álemdik úrdisterdi eskere otyryp, qalamyzdyń bolashaq megapolıs retindegi beınesin damytý.
Dızaın-kodty ázirleý aıasynda halyqaralyq tájirıbeniń taldaýy júrgizilip, sarapshylarmen 15 jobalyq semınar uıymdastyryldy. Qala turǵyndarynyń 13 myńnan astam saýalnamasy jınalyp qarastyryldy. Respondentterdiń 50%–y qalamyzda týǵannan beri turyp kele jatqan almatylyqtar.
Dızaın-kod is júzinde únemi qoldanylatyn jumys qujaty retinde jasalǵan. Sondyqtan qujat qarapaıym tilde jazylǵan jáne naqty adresattarǵa arnalǵan. Bul bizdiń qalamyzdyń turǵyndary, kásipkerler, memlekettik organdar jáne kreatıvti qoǵamdastyq ókilderi men basqalar. Barlyǵy 8 sanat.
Talqylaý jáne naqtylaý nátıjesinde dızaın-kod qalalyq qoǵamdastyqtardyń qajettilikteri men úmitterin tolyq qanaǵattandyrý maqsatynda beıimdeldi. Máslıhattyń salalyq komısıasynyń otyrysynda berilgen eskertýler óz úlesin qosty.
Nursultan Nurlanuly sizge jeke alǵys bildirgim keledi. Siz dızaın-kodty sıpattaǵanda, onyń bolashaq ózgeristerge ashyq qujat ekenin óte oryndy aıtyp óttińiz. Bul qujat qalada ózgerister bastalǵan kezde aıqyndalatyn bolady.
Biz dızaın-kodty birkelki jáne kezeńdi túrde engizýdi josparlap otyrmyz. Qala ákiminiń tapsyrmasy boıynsha jańa tásilderge beıimdelý úshin 1,5 jyl ishinde ótpeli kezeń engiziletin bolady.
Qaladaǵy jańa nysandar úshin dızaın-kodtyń usynystar men talaptardyń tolyq kólemi qoldanylatyn bolady. Qoldanystaǵy bar nysandarmen keshendi túrde jumys ótkizemiz. Kásipkerlerdi óz erkimen jáne belsendi túrde dızaın-kod qaǵıdattaryn engizý jáne sol arqyly qalamyzdyń kelbetin jaqsartý úshin yntalandyrý sharalaryn usynamyz.
Dızaın-kodtyń bólek servıs-saıty ázirlendi. Bul aqparat, resýrstar jınaýǵa jáne bilim almasýǵa arnalǵan ortalyq alań. Sonymen qatar, atalǵan saıt dızaın-kodty engizý barysynda dıalog alańy retinde qoldanylatyn bolady.
Dızaın-kodty ázirleý kezinde barlyq normatıvtik-quqyqtyq talaptar oryndalǵanyn atap ótken jón.
Normatıvtik-quqyqtyq aktilerdi ázirleý qaǵıdalaryna sáıkes, biz «Atameken» Óńirlik kásipkerler palatasynyń, Almaty qalasynyń Qoǵamdyq keńesiniń, Kásipkerlik jáne ınvestısıalar basqarmasy janyndaǵy Saraptamalyq keńestiń oń qorytyndylaryn aldyq.
Qatysýshylardyń pikirleri men múddelerin jan-jaqty esepke alý Almaty qalasynyń dızaın-kody keshendi jáne teńdestirilgen qujat retinde qalyptasýyna yqpal etti.