Dinı qyzmetkerler eriktilerdiń qoldaýymen búgin tańerteńnen bastap ıslamnyń zańdary men sanıtarlyq-epıdemıologıalyq talaptardy saqtaı otyryp, qurbandyq shalý rásimin bastady. Osylaısha din qyzmetkerleri qurban2021.kz. saıty arqyly qaıyrymdy jandar tapsyrys bergen qurbandyq malyn jetkizdi.
Almatyda Qurban aıttyń birinshi kúni 220 janýar qurbandyqqa shalyndy, olardy Almaty turǵyndary onlaın qurban etti, dep habarlaıdy Almaty-akshamy.kz
Qurban aıt merekesi ekinshi jyl qatarynan qashyqtan ótýine baılanysty, qurbandyq shalý rásimi qurban2021.kz. ınternet platformasynda ótinim jasaǵan tapsyrys berýshilerdiń qatysýynsyz ótti.
Bul saıt óz kezeginde qaıyrymdylyq jasaıtyndar men muqtaj adam arasyndaǵy baılanystyrýshy qural. Tapsyrys berýshilerge rásimdi ótkizý týraly tolyq beınebaıan kórsetiledi. Munyń bári arnaıy mal soıý oryndarynda adam kóp jınalmaıtyndaı etip oılastyrylǵan.
Saıt múmkindigin tek qurbandyqqa shalǵysy keletinder ǵana emes, muqtaj adamdar da paıdalana aldy. Barlyq et az qamtylǵan adamdarǵa taratyldy. Merekeniń alǵashqy kúninde 680 otbasy et túrinde kómek aldy. Ony din ókilderi, ımamdar men eriktiler jetkizdi.
«Orbıta» meshitiniń bas ımamy Janbolat Sapashov qurbandyq shalýdyń jańa formatyna qaramastan, ıgi is jasap, muqtaj jandarǵa kómek kórsetýge sheshim qabyldaǵan barlyq eriktilerge, qaıyrymdylyq jasaýshylarǵa alǵysyn bildirdi. Ol Almatynyń barlyq turǵyndaryna densaýlyq, amandyq pen Allanyń raqymyn tiledi.
Imamdardyń aıtýynsha, tapsyrys berýshiler qurbandyq rásimine qatysa almady dep alańdaýdyń qajeti joq. Kez kelgen ıgi isti Alla Taǵala mindetti túrde baǵalaıdy. Dinge sáıkes, basqa musylmanǵa ókilettik berý arqyly janýardy óz atynan qurban etýge ruqsat etiledi.
Muqtaj jandarǵa kómek kelesi eki kúnde de jalǵasady. Óz kezeginde kómek alǵan otbasy músheleri, sondaı-aq jalǵyz basty zeınetkerler Almaty musylmandarynyń dinı basqarmasyna, eriktiler men qaıyrymdylyq jasaýshylarǵa jomarttyǵy men qaıyrymdylyǵy úshin alǵystaryn bildirdi.
Eske salsaq, bıyl búkil álemde Qurban aıt merekesi indetke baılanysty shekteýlermen ótti. Almatyda qurbandyq shalý rásimderi onlaın túrde ótti, al ujymdyq namazdarǵa tyıym salyndy.