Almaty akademıasynyń qyzmetkerleri túrkistandyq áriptesterimen tájirıbe bólisýde.
Túrkistan tórine tájirıbe almasý baǵytynda Mahan Esbolatov atyndaǵy Almaty akademıasynyń bilikti de bilimdi qyzmetkerleri keldi, dep habarlaıdy Almaty-akshamy.kz Polisia.kz-ke silteme jasap.
Mundaǵy negizgi maqsat – ishki ister organdaryn basqarýdyń tıimdi júıesin qurý, polısıaǵa qatysty negizgi mindetterdi jandandyrý.
Atalǵan mańyzy zor dáriske Túrkistan oblysy PD-ǵa qarasty qalalyq, aýdandyq Polısıa basqarma men bólim basshylary qatysýda. Úsh kúnge sozylatyn sabaq barysynda basshy quramnyń biliktiligin arttyrý birinshi orynda tur. Iaǵnı, QR İİM-niń “Mobıldi Akademıa” pılottyq jobasy sheńberinde zamanaýı talaptarǵa sáıkes oqý baǵdarlamasy júrgiziledi.
Almatydan arnaıy kelgen bilikti mamandar qatarynda M. Esbolatov atyndaǵy akademıa bastyǵynyń orynbasary Zań ǵylymdarynyń kandıdaty, dosent Erjan Bımoldanov pen atalǵan akademıanyń aǵa ǵylymı qyzmetkeri, zań ǵylymdarynyń kandıdaty, dosent, otstavkadaǵy polısıa polkovnıgi Leıla Qultemirova, sondaı-aq osy oqý ornynyń İİO basshy quramyn daıarlaý fakúltetiniń joǵary akademıalyq kýrsynyń ádiskeri, pedagogıka ǵylymdarynyń kandıdaty Talǵat Turkenov bar.
Bul kásibı sheberligi mol qyzmetkerler túrkistandyq qatysýshylardy bilim nárimen sýsyndatyp, bar oqyp-túıgenderin jetkizdi. Polısıa men halyqtyń bir-birine barynsha ashyq bolýy, basshy quram men jeke quram arasyndaǵy baılanys qalaı bolý kerektigi aıtylyp, aqyl-keńester berildi. Dáriske qatysýshy tarap, bilimderin jetildirýge at salysyp jatqan áriptesterine alǵystaryn jetkizdi. Polısıanyń jurtqa jaqyn jáne zamanaýı tehnıkalardy meńgerýine baǵyt berip jatqany úshin rızashylyqtaryn jetkizip, óz oılarymen bólisti, pikir almasty.
“Jańa Qazaqstan”, “Servıstik polısıa modelin qurý” jolynda mundaı keleli kezdesýlerdiń berer paıdasy zor. Sebebi polısıanyń oń ımıjin qalyptastyrý, basshy quramnyń qarapaıym da ádil bolýy, halyqpen keri baılanysty nyǵaıtý kún tártibinen túspek emes.