Tórt kún ishinde izdeýde bolǵan 17 adam anyqtaldy
Soltústik Qazaqstan oblysynda alıment tóleýden jaltaryp júrgenderdi anyqtaýǵa baǵdarlanǵan aksıa júrip jatyr. İs-sharanyń tórt kúninde polıseıler mindetin oryndaýdan qashyp, balasyna qaryz bolǵan 9 adamdy anyqtady, dep habarlaıdy Almaty-akshamy.kz QazAqparatqa silteme jasap.
SQO polısıa departamenti baspasóz qyzmetiniń málimetinshe, Petropavl turǵyny óz balasyna alty jyl boıy alıment tólemeı kelgen. Mindetin oryndaýdan jaltarǵan soltústikqazaqstandyq «ákeni» polıseıler qazirgi ýaqytta Almaty qalasynda júrgenin anyqtady. Bul aqparat jeke sot oryndaýshysyna berildi.
Bul kúnderi óńirde SQO polısıa departamenti kóshi-qon qyzmeti basqarmasynyń qyzmetkerlerimen alıment tólemeýshilerdi izdestirý aksıasyn ótkizip jatyr. Alımentterin, ákimshilik aıyppuldaryn tólemeı júrgen boryshkerler, jaqyndarymen týystyq qatynastaryn joǵaltqan adamdar polıseılerdiń nazarynda bolady. Aksıa 19 jeltoqsanda bastaldy. Tórt kún ishinde izdeýde bolǵan 17 adam anyqtaldy. Olardyń 9-y - alıment tólemeýshiler. Sondaı-aq, týystyq qatynastaryn joǵaltqan 5, qaryzdaryn tólemegen 3 adam anyqtaldy. Kóshi-qon qyzmetiniń aıtýynsha, bul jumystar udaıy negizde júrgiziledi.
«Aksıaǵa polısıanyń basqa da qyzmetteri jumyldyrylady. Jyl basynan kóshi-qon qyzmetiniń qyzmetkerlerimen oblys boıynsha barlyǵy 204 izdestirý isi toqtatyldy, onyń 22-si – týystyq qatynastardy joǵaltý, 78-i – boryshkerler jáne 104-i – balalaryna alıment tólemegender boıynsha», - deıdi SQO PD Kóshi-qon qyzmeti basqarmasynyń bastyǵy Talǵat Ábilov.