Bıyl alıment tólemegenderge qatysty 7 qylmystyq, 15 shaqty ákimshilik is qozǵalǵan
Almaty oblysy Talǵar qalasynda alıment tólemeı júrgen ákelerge jumys jármeńkesi ótkizildi, dep habarlaıdy Almaty-akshamy.kz Almaty.tv-ge silteme jasap.
Jármeńkege kelgen 20 shaqty azamattyń jeteýi jumysqa ornalasty. Bıyl alıment tólemeı júrgenderdiń bereshegi 300 mıllıon teńgeden asqan.
57 jastaǵy Almaty oblysynyń turǵyny Murat Jaınaqov – úsh balanyń ákesi. Osydan 2 jyl buryn jarymen ajyrasqan. Balalarynyń aldy kámelettik jasqa tolǵandyqtan, tek sút kenjesine ǵana alıment tóleıdi. Turaqty jumysy bolmaı, balasy aldyndaǵy mindetin oryndaı almaı júrgen. Osydan 5 aı buryn sot oryndaýshylary ony avtobýs júrgizýshisi etip jumysqa turǵyzypty. Al búgin qosymsha tabys tabý úshin jármeńkege kelgen.
«Durys emes. Óz balasy ǵoı, alımentti tóleýi kerek. Óz basym balalarymnan qashyp turǵan joqpyn. Úılendirem. Ómirge ákelgen soń, baǵý – mindettim», – dedi boryshker Murat Jaınaqov.
Almaty oblysyna qarasty Talǵar aýdanynda bıyl alıment tólemegenderge qatysty 7 qylmystyq, 15 shaqty ákimshilik is qozǵalǵan. Onyń úsheýine sot úkimi shyqty. Al qalǵandaryna qatysty tergeý jumysy jalǵasyp jatyr.
«İs-sharanyń negizgi maqsaty – jumyssyz boryshkerlerdi jumysqa ornalastyrý jáne alıment boıynsha qaryz mólsherin azaıtý. Kóp boryshker jumyssyz. Jumyssyz bolýyna baılanysty alıment tóleı almaıdy. Sol sebepti de jumyspen qamtý is-sharasy ótkiziledi», – dedi uıymdastyrýshylar.
Al prokýrorlar men sot oryndaýshylar túrli syltaý aıtyp, alıment tóleýden jaltarǵandarǵa zań qatal ekenin eskertedi. Balasyna tıesili qarajatty 3 aı keshiktirgen ata-anaǵa qylmystyq jaza qarastyrylǵan. Olar 2 jylǵa deıin bas bostandyǵynan aıyrylýy múmkin.