Inklúzıvti orta: Almaty ákimdiginiń ǵımaraty rekonstrýksıadan keıin barlyq azamattar úshin qoljetimdi Bul týraly bas merdiger, «Atrıks-Stroı» JSHS qurylys kompanıasynyń dırektory Ámirjan Nábıev aıtty.
Almatydaǵy qalalyq ákimdik ǵımaraty 1978 jylǵy eski syzbalar boıynsha qalpyna keltirildi. Nysandy qaıta qurý 2022 jyldyń aqpanynda bastaldy. Ǵımarattyń arhıtektýralyq stıli tolyǵymen saqtaldy, edenderdegi, baǵandardaǵy, tóbelerdegi mármár jabyny, sondaı-aq jez elementter qalpyna keltirildi.
«78-shi jyldyń jobalyq sheshiminde bolǵan sýret qaıta jasaldy. Tipti kabınetterdiń konfıgýrasıasy ózgergen joq, tek 3 pavılonda ornalasqan qoǵamdyq qabyldaý bólmesiniń konfıgýrasıasy ózgerdi. Biz birneshe kabınetti biriktirip, alǵash ret osy ǵımaratta halyqtyń barlyq sanattary, sonyń ishinde mobıldiligi tómen azamattar úshin kedergisiz qoljetimdilikti qamtamasyz ettik», - dep atap ótti Á.Nábıev.
Bul aımaq banktik qyzmet kórsetý qaǵıdaty boıynsha jabdyqtalǵan: adam kelip, azamattardyń ótinishterine jedel túrde jaýap beretin mamanǵa talon beriledi.
«Keńes zamanynda ǵımarattardy salý kezinde halyqtyń mobıldiligi tómen toptarynyń qoljetimdiligin qamtamasyz etýge baǵyttalǵan standarttar kózdelmegen. Biz sonyń bárin eskerdik, ákimdik ǵımaratynda nashar kóretinderdi navıgasıalaýǵa arnalǵan taktıldi plıtkalar bar, birinshi pavılon jaǵynan múgedek adamdarǵa arnalǵan pandýs qarastyrylǵan, Jeltoqsan jáne Sátbaev kósheleri jaǵynan az qamtylǵan azamattarǵa arnalǵan joldar bar», - dedi Á. Nábıev.
Ǵımaratty qalpyna keltirý kezinde ınklúzıvti sheshimderdi engizý arqyly azamattardyń barlyq sanattary úshin jaılylyq pen kedergisiz ortany qamtamasyz etý mańyzdy krıterıı boldy. Ákimdik ǵımaratynda lıftiler, elektr kótergish, múgedektigi bar adamdarǵa arnalǵan jýynatyn bólmeler jáne mobıldiligi tómen toptarǵa arnalǵan arnaıy tańbalaý, pandýstar, shaqyrý túımeleri, Braýl alfavıti bar.