Jetisý aýdanyna qarasty №43 jalpy bilim beretin mektep aýlasy merekedegideı bezendirilgen, dep habarlaıdy Almaty-akshamy.kz.
Aýlaǵa kirgen sátte-aq kúmbirlegen kúı boıdy alyp, úlken bir dýmandy saltanattyń bolyp jatqanyn aıshyqtaı túskendeı. Atalmysh mektepke ornalasqan №343 saılaý ýchaskesine kelip, óz daýsyn berip jatqan adamdardyń qatary da jıileı túsken.
– Óz jumysymyzdy tańǵy 6.00-de bastadyq. Ánuran oryndalyp bolǵan soń, baqylaýshylardy tirkedik. Eń alǵashqy daýys berýshimiz Serik Sarchaev saǵat 7.00-de keldi. Qalyptasqan dástúr boıynsha, belsendiligi úshin turǵynǵa estelikke qoıyn dápter syıladyq. Jalpy, bizdiń №343 saılaý ýchaskesinde 2357 saılaýshy bar. Alǵashynda kelýshiler qatary sırek bolǵanymen, tús aýa saılaýshylar qatary artty. Belsendilik tanytyp jatqandar negizinen eresek, orta jastaǵy adamdar. Sondaı-aq, bul joly jasy kelgen 7 adam óz ótinishteri boıynsha úıden daýys berdi. Biz úshin ǵana emes, búkil qala jurtshylyǵy úshin 107 jastaǵy Qansha Jaqsybaevanyń óz qalaýymen saılaý ýchaskesine kelip, daýys bergeni aıtýly oqıǵa boldy, - deıdi №343 saılaý ýchaskesiniń tóraıymy Ǵalıa Álkenqyzy.
Eki ǵasyrdyń kýási barsha qaýymǵa aq batasyn berdi. №343 saılaý ýchaskesi eń qart saılaýshynyń ıyǵyna shapan jaýyp, qurmet kórsetti.