Memleket basshysy Qasym-Jomart Toqaevtyń «Ádiletti Qazaqstannyń ekonomıkalyq baǵdary» atty Qazaqstan halqyna Joldaýynda aıqyndalǵan mańyzdy strategıalyq mindetter men tereń maǵynaly qundylyqtar qataryna kóptegen ózekti jáne mańyzdy dúnıeler endi.
Jyl saıynǵy dástúrli kúz aıynyń basynda jarıalanatyn Joldaýdyń bıylǵy jylǵy basymdylyǵy ekonomıkalyq máseleler ekeni kezdeısoq emes. Óıtkeni, elimizdiń materıaldyq negizderi pármendi damý jolyna túse almaı keledi jáne onyń áleýmettik-ekonomıkalyq qurylymy áli kúnge deıin tolyqtaı jańǵyra alǵan joq. Jylý stansıalaryndaǵy jarylystar, tozyǵy jetken tehnıkanyń jańalanbaýy, búdjettiń tıimsiz paıdalanýy sıaqty derekter Joldaýda zamanaýı kezeńniń ashshy shyndyǵy retinde jarıalandy. Bul jerdegi synı taldaýdyń túpki astarynda qazaqstandyq qoǵamdy órkenıetti elderdiń qataryna qosý ıdeıasy jatyr. Sonymen qatar, Memleket basshysy burynǵy jyldary ústirt qana atalyp ótetin sý problemasyna jańasha kózqarasty qalyptastyryp, sý saıasatyn júrgizýdi usyndy. Bolashaqta elder arasynda sý máselesi memleketaralyq qatynastardyń mańyzdy qyryna aınalatyndyǵy bıylǵy jyldyń ózinde erekshe sezile bastady.
Qazaqstan Prezıdenti «Ádiletti Qazaqstan» men «Adal azamat» sıaqty uǵymdardyń bizdiń qoǵamymyzda basymdyq tanytýy tıis ekenin ataı kelip, jastar arasyndaǵy kreatıvtilik, mobıldilik, ashyq suhbatqa daıyndyq sıaqty qasıetterdiń keńinen taralýyna nazar aýdardy. Qazirgi kezeńde álde de sheshimin tappaı kele jatqan problemalardyń qataryna kásibı bilimniń óndiriske tıimdi paıdasyn tıgize almaı kele jatqanyn jatqyzýǵa bolady. Joǵary oqý oryndary men óndiris oryndary arasynda ózara seriktestikke negizdelgen shynaıy, adal jáne ádil qatynastar ornamasa qoǵamdaǵy, ekonomıkadaǵy pármendi damýǵa, jańǵyrý men jańarýlarǵa qol jetkize almaımyz. Osy sıpattaǵy sapalyq jáne sandyq kórsetkish oqý ornynyń mańyzdylyǵy men qarjylandyrýyn anyqtaýy tıis. Ár túrli deńgeıdegi basshy mamandardyń jeke jaýapkershilikterin arttyrmaı, aıtylǵan sóz aıtylǵan jerinde qalýy da múmkin.
«Halyq únine qulaq asatyn memleket» qaǵıdatyn naqty iske asyrýymyz kerek degen sóz Memleket basshysy tarapynan aıtyldy. Ony tek Prezıdenttiń ózi ǵana júzege asyrmaıdy. Sondyqtan aımaqtyq deńgeıdegi osy tetiktiń jumys isteý qabileti men nátıjeleri únemi baqylanyp, esep berilip otyrylýy tıis. Demokratıanyń aıqyn kórinisi aıshyqtala túsýi qazirgi kezeńde óte mańyzdy. Sebebi, biz «Ádiletti Qazaqstan» men «Adal azamat» uǵymdaryn erekshe qundylyqtar retinde dáriptep qana órkenıetti eldiń qataryna qosyla alamyz.