Kıevtegi Qazaqstan elshiligi shtattyq rejımde jumysyn jalǵastyrýda.
Jalpy, QR azamattaryn Ýkraınadan evakýasıalaý bastalǵannan beri Qazaqstannyń shet elderdegi mekemeleri 553 azamattyń shyǵýyna kómek kórsetti, dep habarlaıdy Almaty-aksha,y.kz QazAqparatqa silteme jasap.
Onyń ishinde Polshaǵa 526 adam, Moldovaǵa – 21 adam, Moldovadan Rýmynıaǵa 9 adam, onyń ishinde 7 adam Qazaqstanǵa ushyp ketti, 2 azamatty Býharesttegi QR Elshiligi qonaq úıge ornalastyrdy, Majarstanǵa 5 adam, Slovakıaǵa 1 adam shyqty.
Búgingi tańda «Air Astana» áýe kompanıasynyń úsh evakýasıalyq ushaǵymen Qazaqstanǵa 432 adam qaıtaryldy.
Qazir tórtinshi evakýasıalyq ushaqty jiberý boıynsha jumys júrgizilýde. Reıs Katovıse qalasynda (Polsha) azamattardyń qajetti sanynyń jınalýyna qaraı júzege asyrylady.
Qazaqstandyq dıplomattar joǵaryda atalǵan memleketterdiń shekarasynan ótýdi, azamattardy jınaýdy jáne ornalastyrýdy, sondaı-aq Qazaqstanǵa odan ári jóneltýdi qamtamasyz etýde. Aıta ketetin jáıt, osyǵan deıin Ýkraınadan shyqqan birqatar otandastar Eýropalyq Odaq aýmaǵynda qalýǵa sheshim qabyldady.
Qazirgi ýaqytta Katovıse qalasynda 30 QR azamaty bar, Ýkraına-Polsha shekarasynda 30 jolaýshysy bar taǵy 1 avtobýs óz kezegin kútýde. Lvovtaǵy QR Qurmetti konsýldyqtyń janyndaǵy evakýasıalyq jınaý núktesinde 9 adam, Kıevtegi QR Elshiliginde 10 adam, Harkovta 7 adam bar. Kıevtegi QR Elshiligi shtattyq rejımde jumysyn jalǵastyrýda.
«Atameken» UKP aqparatyna sáıkes, Ýkraınadaǵy áskerı áreketter bastalǵannan keıin sol eldiń aýmaǵynda 47 júrgizýshi – QR azamattary jáne 8 júrgizýshi – shet memleketterdiń azamattary bar jalpy 55 birlik avtokólik qalyp qaldy.
Qazirgi ýaqytta QR shet elderdegi mekemeleriniń tikeleı kómegimen jáne aralasýymen 55 avtokólik quraldarynyń 31-i shyqty, onyń ishinde 11 kólik Reseıge, 8 kólik Moldovaǵa, 12 kólik Polshaǵa shyqty, qalǵan 24 avtokólik Ýkraına aýmaǵynda qalyp qoıdy.
QR SİM júrgizýshilermen baılanys ornatqan, olardyń tizimderi jasalyp, avtokóliktiń ornalasqan jeri naqtylandy. Júk tasymaldaýshylardyń turǵan jerine baılanysty QR tıisti sheteldik mekemelerge avtokólik quraldaryn evakýasıalaý boıynsha tapsyrmalar berildi. Bul baǵyttaǵy jumys jalǵasýda.