Jańa jyldan bastap bala kútimine baılanysty járdemaqy alýshylarǵa járdemaqy tóleý merzimi avtomatty túrde uzartylady.
Memleket basshysy «QR keıbir zańnamalyq aktilerine memlekettik jastar saıasaty jáne áleýmettik qamsyzdandyrý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy dep habarlaıdy Almaty-akshamy.kz
«Zań jobasyna qol qoıylǵannan keıin, 2023 jylǵy 1 qańtardaǵy jaǵdaı boıynsha, bala kútimine baılanysty járdemaqy alýshylarǵa járdemaqy tóleý merzimi Memlekettik organdardyń aqparattyq júıelerinde bar málimetter negizinde avtomatty túrde uzartylady», – dep naqtylady Eńbek jáne halyqty áleýmettik qorǵaý vıse-mınıstri Nazgúl Saǵyndyqova.
1,5 jasqa deıingi balalary bar jumys istemeıtin ata-analar úshin respýblıkalyq búdjetten járdemaqynyń eki túri tólenetin bolady.
Birinshi – bala týǵanda beriletin birjolǵy járdemaqy. Buǵan 2023 jylǵa 65,8 mlrd teńge kózdelgen. 2022 jyly birinshi, ekinshi, úshinshi bala týǵanda beriletin járdemaqy mólsheri 120 840 teńgeni (38 AEK), tórtinshi jáne odan da kóp bala týǵanda 200 340 teńgeni (63 AEK) qurady.
Ekinshi – bir jarym jasqa deıingi bala kútimi boıynsha járdemaqy. Týǵan balanyń kezektiligine baılanysty saralanǵan mólsherde beriledi. Bul maqsatqa 2023 jyly 43,8 mlrd teńge qarastyrylǵan.
Jumys isteıtin ata-analar úshin respýblıkalyq búdjetten bala týǵan beriletin birjolǵy járdemaqy jáne Memlekettik áleýmettik saqtandyrý qorynan 1,5 jasqa deıingi bala kútimi boıynsha áleýmettik tólem tólenetin bolady. Aıta keteıik, áleýmettik tólem mólsheri keıingi eki jylda áleýmettik aýdarymdar júrgizilgen ortasha aılyq tabystyń 40 paıyzyn quraıdy.