Nú-Iorktegi jańa jumysynyń alǵashqy kúni bolatyn.
2001 jyly Nú-Iorktegi Búkilálemdik saýda ortalyǵynda bolǵan lańkestik shabýyldan 32 jastaǵy otandasymyz Janetta Soı qaza tapty, dep habarlaıdy Almaty-akshamy.kz Exk.kz-ke silteme jasap.
Nú-Iork munarasynda bastalǵan jańa ómir.
2001 jyl 11 qyrkúıek tańerteńgi saǵat 9:00. Bul kúni otandasymyz Janetta Soı jańa ómirge alǵashqy qadamyn basty. Óıtkeni AQSH-taǵy jańa jumysynyń alǵashqy kúni bolatyn. Joldasy Vácheslav ekeýi kóptegen qıynshylyqtardy artqa tastap, olardy «jarqyn bolashaq kútip tur» dep sendi. Buryn tek kınolardan kórip júrgen bıik-bıik aspanmen talasqan munalardyń arasymen Janetta Búkilálemdik saýda ortalyǵynyń ǵımaratyndaǵy jańa jumysyna keldi. Dál amerıkalyq kınodaǵydaı edi.
32 jastaǵy almatylyq Janetta Soı Amerıkaǵa Marsh & McLennan kompanıasynyń Qazaqstandaǵy keńsesinen aýysyp keldi. Ol osyǵan deıin otbasymen birge AQSH-ta turýǵa múmkindik beretin jasyl kartany (grın-karta) utyp alǵan edi. Keıin ózi esepshi bolyp jumys isteıtin kompanıa oǵan Nú-Iorktegi keńsede jumys isteýge usynys bildirdi. «Mine taǵdyrdyń syıy» dep oılady Soı áýleti. Alaıda taǵdyrdyń syıynyń artynda Soı otbasy úshin eshqashan umtylmaıtyn jazylmas qaıǵy jasyrynyp turǵan edi.
«Sol kúni jumysqa qatty asyqty».
Janetta jumysqa 17 qyrkúıek shyǵýy tıis bolǵan. Alaıda kompanıa basshylyǵy oǵan erterek shyǵýdy ótingendikten, ol alǵashqy jumys kúnin 11 qyrkúıekte bastady (keıbir derekterde 10 qyrkúıek dep kórsetiledi). Bulaı asyqpaǵanda, bálkim tiri qalar ma edi, kim bilsin?!
- Ol sol kúni jumysqa qatty asyqty. Úlgermeı qalamyn dep qoryqty. Jańa jumysynda bári sátti bastalǵanyn qalady. Alaıda bári basqasha boldy,
- deıdi joldasy Vácheslav Lıgaı.
«Ál-Kaıda» (Qazaqstanda tıym salynǵan uıym) sodyrlary ushaqty basyp alyp Búkilálemdik saýda ortalyǵynyń ǵımaratyna baǵyttap, jarǵan kezde, otandasymyz Janetta naǵyz amerıkalyq bıkeshter qatarynda jumys istep jatqan edi.
Súıegi tek jeti aıdan keıin ǵana tabyldy.
Birneshe aılar boıy Janetta qaıtys bolǵandar men tiri qalǵandardyń tiziminde bolmady. Alǵashqy kúnderi QR Syrtqy ister mınıstrligi qaza tapqandardyń arasynda qazaqstandyqtar joq ekenin málimdegen bolatyn. Janettanyń ata-anasy men joldasy onyń tiri qalǵanyna senimdi boldy. Alaıda jeti aı ótkennen keıin olardyń úmitteri úzildi - saraptama ǵımarattan tabylǵan súıekterdiń Janettaǵa tıesili ekenin rastap berdi.
- Qyzymyz qaıda jumys isteıtinin bilemiz ǵoı. Jańalyqtardan kórsetip jatqanda birden oǵan habarlastyq. Telefon tutqasyn kótermedi. Vácheslav ta bizdiń qońyraýymyzǵa jaýap bermedi. Tek úsh kúnnen keıin onyń joǵalyp ketkenin bildik, - deıdi anasy Raısa Soı.
Janettanyń týystary kúıeý balasy Vácheslav pen jıeni Aleksandrany birneshe ret elge shaqyrdy. Alaıda ákesi men qyzy elge oralýdan bas tartty. Aıtpaqshy, qyzy Aleksandra qazir sportta úlken belesterdi baǵyndyryp júr.
- Qazaqstanǵa qaıtpaımyz. Tiri bolsyn, óli bolsyn - meniń áıelim osynda. Ol osynda bolǵan kezde, biz onyń qasynan tabylamyz, - deıdi Vácheslav Soı.
Janettanyń esimi tasqa oıylyp jazyldy.
Soı otbasy ár jyldyń 11 qyrkúıeginde Janettany eske alyp, onyń qabirine baryp turady. AQSH-taǵy qazaqstandyqtar da osy kúni Janettanyń esimi oıylyp jazylǵan «11 qyrkúıek» memorıalyna baryp, gúl shoqtaryn qoıady. 2015 jyly memorıalǵa QR Tuńǵysh Prezıdenti Nursultan Nazarbaev ta baryp, terakt qurbandaryn eske alý rásimine qatysty.