1 sáýirde Otbasy bankke aýdarylǵan birjolǵy zeınetaqy tólemderi Biryńǵaı jınaqtaýshy zeınetaqy qoryna qaıtaryla ma? Bul týraly banktiń baspasóz qyzmetinen málim etti, dep habarlaıdy Almaty-akshamy.kz.
«2022 jylǵy 1 sáýirde qazaqstandyqtardyń Otbasy banktegi arnaıy shottaryndaǵy birjolǵy zeınetaqy tólemi BJZQ-ǵa qaıtarylady degen qaýeset tarady. Osyǵan baılanysty, Otbasy banktegi azamattardyń arnaıy shottaryndaǵy qarajat olardyń menshigi ekenin túsindiremiz. Arnaıy shotqa aqsha túsken sátten bastap qazaqstandyqtardyń turǵyn úı jaǵdaılaryn jaqsartý maqsatynda olardy paıdalaný boıynsha rastaıtyn qujattardy usyný úshin 20 jumys kúni bar. Osylaısha, naýryzdyń aıaǵynda arnaıy shotqa túsken aqshany 2022 jyldyń 30 sáýirine deıin qoldanýǵa bolady. Eger qarajat emdelý maqsatynda suralyp, arnaıy shotqa túsken bolsa, onda azamattardyń olardy paıdalaný maqsatyn rastaý úshin 45 jumys kúni bar», - delingen atalǵan bank habarlamasynda.
Qarjy ınstıtýtynyń atap ótýinshe, arnaıy shotqa óz qarajatyn túsirip qoıǵan ótinish berýshiler banktiń aımaqtyq fılıaldaryna barmaı-aq, qujattardy asyqpaı jınaýy kerek. Óıtkeni barlyq rásimder onlaın rejıminde ótedi.
Sondaı-aq áleýmettik jelilerde sońǵy úsh kúnde zeınetaqy jınaqtarynyń artylǵan somasy joǵalyp ketti degen qate málimdemeler taralyp jatyr. Mysaly, 2022 jylǵy 25-28 naýryz aralyǵynda berilgen 53 649 ótinimdi, suralǵan qarajattyń jetkiliksizdigine baılanysty, BJZQ keri qaıtardy. Buǵan valúta baǵamynyń ózgerýi jáne osyǵan baılanysty zeınetaqy jınaqtaryn qaıta baǵalaý áser etti. 2022 jylǵy 25 naýryzda zeınetaqy aktıvterin qaıta baǵalaýǵa yqpal etken dollardyń baǵamy 494,16 teńgeni, al 2022 jylǵy 28 naýryzda 484,49 teńgeni qurady.
Óziniń birjolǵy zeınetaqy tólemin burynǵy shekti kórsetkish boıynsha paıdalaný úshin Otbasy bank enpf-otbasy.kz portalynda ótinim berýdi 2022 jyldyń 29 naýryzyna deıin úlgerýdi usyndy. Sebebi, turǵyn úı jaǵdaılaryn jaqsartýǵa jáne otbasyn emdeýge arnalǵan BZT-in paıdalaný qaǵıdalaryna sáıkes bank 2 jumys kúni ishinde ótinimdi óńdep, BJZQ-ǵa jiberedi. BJZQ qoldanystaǵy shekti kórsetkish boıynsha ótinimderdi 2022 jyldyń 31 naýryzyn qosa alǵanda saǵat 23:59-ǵa deıin qabyldaıdy jáne qarastyrady.
Búgin BJZQ-ǵa joldanatyn ótinimdi tolyq jasap aıaqtamaǵan 35 myń ótinish berýshige SMS habarlama jiberiledi. Olardy portalǵa kirip, ESQ kómegimen eki ótinishke qol qoıýdy suraımyz: jeke tabys salyǵyn ustap qalý týraly jáne birjolǵy zeınetaqy tólemine arnalǵan ótinish.
«Ótinimderdiń kópshiligi qaıtalanady. Birneshe ret ótinish bergen rekordsmender bar. Biraq dál osy naýryz aıynda biz qalypty jaǵdaıǵa jatpaıtyn prosesterdi baıqadyq: mysaly, 5 teńge alýǵa ótinim boldy, 40 teńgeden 2000 teńgege deıingi somaǵa 161 ótinim joldandy. Adamnyń kompúterlik saýattylyǵynyń ortasha deńgeıinde portalda bolý ýaqyty 15-20 mınýtty alatynyn eskersek, mundaı operasıalardyń qarjylyq máni túsiniksiz. Sondaı-aq aqylǵa qonymsyz suranystary bar ótinimder túse bastady. Mysaly, portalda 200 mln teńgeden 6 mlrd teńgege deıin 627 ótinim kelip tústi. Birjolǵy zeınetaqy tólemderiniń mundaı somasy buryn-sońdy bolmaǵany túsinikti. Mamyr aıynyń basynda zeınetaqy jınaqtaryn paıdalaný jáne osy biregeı jobanyń erekshelikteri týraly halyqqa tolyq esep jarıalaýdy josparlap otyrmyz», - dep atap ótti «Otbasy bank» AQ Basqarma tóraǵasy Lázzat Ibragımova.