ҚМДБ төрағасы «Рамазан сыйы» қайырымдылық марафонына қатысты
Қазақстан мұсылмандары діни басқармасы ұйымдастыруымен ел Тәуелсіздігінің 35 жылдығына орай «Рамазан сыйы» атты қайырымдылық марафоны басталды. Ауқымды шараның мақсаты – қасиетті Рамазан айында республика бойынша 35 мың отбасыға азық-түлік себетін тарату. Игі бастамаға Бас мүфти Наурызбай қажы Тағанұлы арнайы қатысып, қайырымдылықтың сауапты іс екенін атап өтті. Ол бұл акция ел бірлігі мен ынтымағының, бауырмалдық пен жанашырлықтың айқын көрінісі екенін жеткізді. Сондай-ақ тәуелсіздікпен бірге артылған жауапкершіліктің бір өлшемі – халыққа қызмет ету екенін айтты. Марафон Рамазан айының соңына дейін жалғасады. Шараға еліміздің барлық өңірлеріндегі мешіт имамдары, «Зекет және қайырымдылық» қорының қызметкерлері мен еріктілері, демеушілер атсалысып жатыр.
