Қазақстан Президенті Қасым-Жомарт Тоқаев Қазақстан халқы Ассамблеясының ХХХІV сессиясында сөйлеген сөзінде көршілік қарым-қатынас пен аймақтық тұрақтылыққа қатысты ұстанымын айқындап, қазақ халқының тату көршілік дәстүрін қазіргі заманғы дипломатиялық саясатпен сабақтастыра білді. Бұл туралы Aqshamnews.kz сайты хабарлайды.
Мемлекет басшысы қазақ халқының дәстүрлі құндылықтарының бірі – көршімен тату тұру екенін атап өтті. Бұл ұғым тек салт-дәстүрде емес, дінімізде де бекітілген қағида ретінде сипатталды.
"Қазақ қашанда көршісін қадірлей білген. Қуанышта да, қиындықта да көршісіне сүйенген, көршінің қасынан табылған. ‘Көрші ақысы – тәңір хақысы’ деген ұғым дінімізде және дәстүрімізде бар. Бұл – бізге атадан қалған өсиет, анадан берілген қасиет", – деді Тоқаев.
Ол қазіргі таңда да бұл дәстүрдің жалғасып келе жатқанын, көпұлтты қоғамымызда әртүрлі этнос өкілдерінің бейбіт қатар өмір сүріп жатқанын мысалға келтірді.
Президент Қазақстанның көрші елдермен тату, сындарлы, бауырластық негіздегі байланысын жоғары бағалап, бұл бағытта ешқандай түйткілді мәселе жоқ екенін баса айтты.
"Ресей – Қазақстанның бұрыннан келе жатқан негізгі стратегиялық серіктесі әрі сенімді одақтасы. Қытай елімен ықпалдастық тамыры да тереңде жатыр. Қытай халқы қазақ халқына ешқашан зиян келтірген жоқ, болашақта да зиян келтірмейді", – деді Мемлекет басшысы.
Сонымен қатар, Қырғызстан, Өзбекстан, Түрікменстан және Әзербайжанмен арадағы рухани, тарихи бауырластыққа тоқталып, бұл елдермен ынтымақтастықтың сенім мен сыйластыққа негізделгенін жеткізді.
"Алатауды тең жайлаған қырғыздар – бір туған бауырларымыз. Ежелден еншілес өзбек ағайынды өз ағам деп қадір тұтамыз. Түрікмендерді туыс санап, шын жүректен құрметтейміз. Қарт Каспийдің жағасындағы әзербайжан еліне деген ықыласымыз да ерекше", – деді Тоқаев.
Президент Қазақстан мен Ресей арасындағы құрлықтағы ең ұзын шекараның бейбіт түрде шегенделуін ерекше мысал ретінде атап өтті. Сонымен қатар, Орталық Азиядағы мемлекеттердің де шекара мәселелері бойынша тарихи шешімдерге қол жеткізгенін қуанышпен жеткізді.
"Қырғызстан, Өзбекстан және Тәжікстан ұзақ жыл бойы шешімін таппаған шекара мәселесі бойынша ортақ мәмілеге келіп, тарихи келісімге қол қойды деп айтуға болады. Біз бауырлас елдер үшін қуанамыз, оларды әрдайым қолдаймыз", – деді ол.