Ауыл шаруашылығы вице-министрі Аманғали Бердалин Үкімет отырысынан кейін өткен баспасөз мәслихатында ауланған киіктің еті қалай дайындалатынын және оның халал талаптарына сай екенін айтты, - деп хабарлайды Aqshamnews.kz
Журналистердің "Киік еті адал сойылғанына қандай кепілдік бар?"деген сұрағына жауап берген вице-министр:
"Ауланған киіктің бәрі міндетті түрде бауыздалады. Етке жіберілмес бұрын ветеринариялық-санитариялық сараптамадан өтеді. Сараптамадан өтпеген ет сатуға жіберілмейді. Бұл жұмысқа тиісті инспекторлар тартылған", — деді Бердалин.
Оның айтуынша, киік мекендейтін өңірлердің топырағы мен суы, сондай-ақ жайылымдағы басқа жануарлар да ауруға тексеріледі."
Сондықтан киік етін сою мен сатуға қатысты күмән болмауы керек. Қатаң бақылау бар. Қорықпай-ақ алуға болады", — деді вице-министр.
Қазіргі уақытта 15 ет комбинаты киік етін өңдеуге жұмылдырылған.