Қызылорда облысында көкпар кезінде жүргізуші көлікпен ойын алаңына кіріп кетіп, бірнеше жылқыны қаққан.
Қызылорда облыстық Полиция департаментінің хабарлауынша, бұл оқиға 2025 жылдың 1 қарашасында Шиелі ауданының Алғабас ауылында, жергілікті тұрғын ұйымдастырған көкпар кезінде болған.
"Әлеуметтік желіде жарияланған бейнежазба бойынша тексеру жүргізілді. Оқиға бойынша бұзақылық дерегімен қылмыстық іс қозғалды. Автокөлік жүргізушісі полиция бөліміне жеткізілді", – делінген департамент хабарламасында.
Полиция сотқа дейінгі тергеу барысында оқиғаға қатысқан барлық тұлғаның әрекетіне құқықтық баға берілетінін атап өтті.
Сонымен қатар, тәртіп сақшылары азаматтарға ескерту жасады: "Кез келген спорттық немесе мәдени-бұқаралық іс-шараны өткізу үшін уәкілетті органдарды алдын ала хабардар ету қажет. Ұйымдастыру тәртібін бұзған тұлға әкімшілік жауапкершілікке тартылды".