Атом электр станциясын салу мәселесіне қатысты талқылаулардың маңызы өте жоғары.
Бұл талқылаулар «АЭС не үшін салынып жатыр, ол кімге керек, мемлекетіміз бен қоғамға қандай пайда әкеледі?» деген маңызды сұрақтарға жауап береді. Халықты толғандырған сауалдарға мамандар нақты және тиянақты жауап беріп отыр. Ең бастысы, барлығы референдумның нәтижесіне байланысты. Халықтың шешімі – бірінші орында.
Біздің университетіміз, Әл-Фараби атындағы ҚазҰУ, АЭС бойынша білікті мамандар дайындауға қабілетті. Жақында біз «Ядролық инженерия» мамандығын аштық. Оған студенттер қабылданды және олар төрт жыл бойы білім алады. Алғашқы екі жылда студенттер университетте теориялық білім алса, қалған екі жылда Ядролық физика институтында тәжірибеден өтеді. Бұл институтта зерттеу реакторы бар, сондықтан студенттер сол жерде практикалық білімдерін жетілдіріп, нақты тәжірибе жинақтайды.
Қазақстанда Кеңес одағы кезінен бері бірнеше реактор бар және оларды модернизациялау жұмыстары жүргізілуде. Осы реакторларда жұмыс істеген мамандардың барлығы АЭС салу жағдайында да дайын болады. Егер АЭС салу туралы шешім қабылданса, құрылыс жұмыстарының өзі 8–10 жыл уақытты талап етеді. Осы уақыт аралығында қосымша АЭС мамандарын дайындау қажеттігі туындайды. Біз оларды нақты бағыттар бойынша даярлаймыз.
8 жыл – білікті мамандарды дайындауға жеткілікті уақыт деп есептеймін. Қазіргі таңда АЭС салу мәселесі тек энергетикалық қауіпсіздікке қатысты емес, сонымен қатар еліміздің ғылыми-техникалық әлеуетін дамыту үшін де маңызды. Осы орайда, бізге білікті кадрлар қажет, ал оларды дайындау біздің қолымызда.
Сондықтан шешім қабылданғаннан кейін, елдің болашағы үшін жаңа энергетикалық кезеңге дайын болуымыз керек. Халықтың пікірі мен қолдауы бұл мәселеде басты рөл атқарады, өйткені АЭС – тек энергетикалық қадам емес, ұлттың ұзақ мерзімді даму стратегиясының бір бөлігі.