Мамандардың айтуынша, қазіргі таңда Қазақстанда энергия тапшылығы бар және алдағы 5 жыл ішінде бұл тапшылықтың көлемі 13 миллиард киловатт сағатқа жетуі мүмкін. Тығырықтан шығудың ең тиімді жолы — атом электр станциясын (АЭС) салу.
Бір ғана АЭС күннен, желден және судан алатын қуат көздеріне қарағанда бірнеше есеге артық энергия өндіреді, бұл оның тиімділігін дәлелдейді, деп хабарлайды aqshamnews.kz.
Қазақстанда қуат көздері тозып тұр. Қолданыстағы электр станцияларының 60%-ы ескірген және жыл өткен сайын олардың энергия өндіру мүмкіндігі де азаюда. Сонымен қатар, көмір электр станцияларының экологияға келтіретін зияны орасан зор. Мысалы, тәулігіне 20 мың тонна көмір жағылған кезде ауаға 140 тоннаға дейін шаң-тозаң және 200 тонна азот оксиді тарайды. Бұл жағдай қоршаған ортаға және халықтың денсаулығына кері әсерін тигізеді.
Қазақстанда жаңартылатын энергия көздерінің үлесі небәрі 6%-ды құрайды. Күн және жел станциялары бар болғаны 2900 мегаватт қуат өндіреді, бұл жалпы қажеттілікті толық қамтамасыз етуге жеткіліксіз.
АЭС тек энергия тапшылығын шешудің ғана емес, сонымен қатар, экологияға зиян келтірмейтін таза энергия көзі болып табылады. Оның жоғары қуаттылығы мен тұрақтылығы еліміздің энергетикалық қауіпсіздігін нығайтуға және тұрақты дамуына септігін тигізеді. Қазақстан үшін АЭС салу — энергетикалық тәуелсіздікке қол жеткізудің және экономикалық тұрақтылықты қамтамасыз етудің маңызды қадамы.