Алакөл ауданында полицейлер жол-көлік оқиғаларынан қаза тапқандарды еске алу апталығы аясында "Жарық шам" акциясын өткізді.
Іс-шараның мақсаты – жолдарда өмірі үзілген азаматтарды құрметпен еске алу және қоғам назарын жол қозғалысы ережелерін қатаң сақтауға аудару. Акция барысында полицейлер жол-көлік оқиғаларында қаза болғандарды бір минут үнсіздікпен еске алды.
Әрбір жол қозғалысына қатысушының жеке жауапкершілігінің жоғары болуы керектігін, ал жолдағы қауіпсіздік барлық санаттағы жүргізушілердің, жаяу жүргіншілердің тікелей жауапкершілігі. Сонымен қатар балаларға жол мәдениетін үйрету – ата-аналардың басты міндеті екенін атап өтті. Іс-шараның тағы бір маңызды бөлігі – полиция қызметкерлерінің шығармашылық орындауы болды.
Олар жол қауіпсіздігі тақырыбына арналған авторлық ән жазып, оны көпшілікке ұсынды. Әнде магистраль, мопед, адам өмірін жалмаған қателіктер мен құқық бұзушылықтар, заң мен тәртіптің құндылығы туралы жүрекке жететін жолдар орындалды. Музыка арқылы полицейлер қарапайым, бірақ өте маңызды ойды жеткізді.
Әрбір адам өмірі – баға жетпес, ал қайғылы жағдайдың алдын алу – әрбіріміздің қолымызда. Полиция мұндай іс-шаралар қоғамда жол ережелеріне жауапкершілікпен қарауды қалыптастыруға және тұрғындар мен құқық қорғау органдарының өзара байланысын нығайтуға ықпал ететінін атап өтті. Қаза тапқандарды еске алу – жол қозғалысы ережелерін сақтау формальды емес, күнделікті өмір нормасы болуы тиіс екенін еске салады.