Қазақстанда танымал блогер Mellstroy-ға қатысты іздеу жарияланды. Бұл ақпарат Қаржы мониторингі агенттігі қозғаған іздеу ісі бойынша Бас прокуратураның құқықтық статистика және арнайы есепке алу порталында жария болды, деп хабарлайды Аqshamnews.kz.
Сот блогерге қатысты «қамауда ұстау» түріндегі бұлтартпау шарасын санкциялаған.
Агенттік Mellstroy-дың Қазақстан аумағындағы интернет пайдаланушыларын да нысанаға алған заңсыз онлайн-казино — “Mellstroy.game” платформасын жарнамалағаны үшін күдікке ілінгенін атап өтті.
Блогер әлеуметтік желілерде кең ауқымды жарнамалық кампания ұйымдастырып, түрлі ұтыс ойындары мен челлендждер жариялаған. Қатысушыларға TikTok, YouTube Shorts және басқа да платформаларда казино атауын, логотиптерін және сайт сілтемелерін көрсететін видеолар түсіру ұсынылған.
Ресми мәліметтерге сәйкес, Mellstroy бұған дейін Ресейде тікелей эфир кезінде адамды ұрып-соққаны үшін жауапкершілікке тартылған. Ал 2025 жылдың қарашасында Минск қалалық соты оның барлық каналдары мен логотиптерін экстремистік материал деп таныған.
Mellstroy деген кім?
Mellstroy атымен танылған Андрей Бурим – Беларусьтен шыққан стример, блогер және инфлюенсер. Ол орыс тілді желі қолданушылары арасында «trash-стриминг» жанры арқылы кеңінен танылды. Бұл бағыттағы контент әдетте арандатушылыққа, шок туғызатын әрекеттерге және орынсыз қылықтарға негізделеді.
Андрей Бурим стримерлік мансабын 2017 жылы Twitch пен YouTube платформаларында ойын трансляцияларынан бастаған. Кейіннен ол алкоголь, түнгі сауық кештері, донат-челлендждер мен түрлі ұтыс ойындарына құрылған «лайв-шоуларға» ауысты. Оның аудиториясы негізінен ТМД елдерінің жастары, ал Instagram, Twitch және YouTube-та миллиондаған жазылушысы бар.