2025 жылдың 1 қарашасындағы мәліметке сәйкес, Қазақстанда жұмыссыздық бойынша әлеуметтік төлем алушылар саны 308,4 мың адамға жетті. Бұл туралы Еңбек министрлігі мәлімдеді, деп хабарлайды Аqshamnews.kz тілшісі.
Министрлік деректеріне қарағанда, 268,6 мың адамға биыл алғаш рет жұмыссыздық бойынша жәрдемақы рәсімделген. Жыл басынан бері МӘСҚ тарапынан жалпы сома 106,8 млрд теңге төленген. Салыстыру үшін: 2024 жылы жұмыссыздық бойынша әлеуметтік төлемдерді 1,4 млн қазақстандық алған.
Жәрдемақы 1–6 ай аралығында төленеді және жоғалған табыстың 45%-ына дейін өтейді. Төлем мөлшері азаматтың жұмыс өтілі мен соңғы екі жылдағы орташа табысына байланысты есептеледі.
Айта кетейік, жұмыссыздық бойынша жәрдемақы азамат ресми түрде жұмыссыз мәртебесін алған күннен бастап тағайындалады.
11 қарашада «Азаматтарға арналған үкімет» КЕАҚ қазақстандықтарға жәрдемақы алу тәртібі мен қажетті құжаттар туралы түсіндіру жұмысын жүргізген болатын.
Жәрдемақы алу үшін келесі шарттар орындалуға тиіс:
-
өтініш беруші ресми түрде жұмыс істеген болуы керек;
-
кемінде 6 ай көлемінде әлеуметтік аударымдар төленген болуы қажет;
-
азамат ресми жұмыссыз мәртебесін алуы тиіс.
Министрлік жұмыссыздық бойынша төлемдер еңбек нарығындағы азаматтарды әлеуметтік қорғау тетігі болып қала беретінін атап өтті.