Қазақстан аумағында да ұрыстар болғанын көпшілік біле бермейді. Ең алғашқы ұрыстар елдің батыс өңірінде болған.
Қазіргі Батыс Қазақстан облысы, Бөкей ордасы ауданының тұрғындары соғыстың зардабын тартты (ол кезде — Орал облысы), деп хабарлайды aqshamnews.kz Мәдениет және ақпарат министрлігіне сілтеме жасап.
Гитлер әскері 1942 жылдың 1 қыркүйегінде Орал қаласын басып алуды жоспарлаған. Осы сәттен бастап Қазақстан аумағын жаулап алу басталуы тиіс еді.
Жәнібек, Сайқын және Шонғай станцияларын жау авиациясы бомбалады. Бұл елдімекендерден небәрі 80 шақырым қашықтықта Сталинград үшін қиян-кескі шайқастар жүріп жатқан еді. Астрахань – Саратов темір жолымен Сталинград шайқасына қару-жарақ, жанармай, дәрі-дәрмек және әскери жабдық тиелген көліктер тасымалданды. Сонымен қатар, осы шекара маңындағы ауылдар Қазақстанның мұнай мен газға бай батыс аймағына (Гурьев облысының мұнай кен орындарына) баратын транзиттік нүкте болды.
Фашистердің бұл өңірге көз тігуінің тағы бір себебі – Батыс Қазақстанның оңтүстік аудандары арқылы Сталинград майданы мен Жоғарғы Бас қолбасшы ставкасы арасында байланыс желісі орнатылған. Немістер осы желіні жою үшін бар күшін салды.
Кейбір деректерге қарағанда, Батыс Қазақстан аумағына 700-ден астам бомба тасталған. Бомбалаудан қаза тапқан бейбіт тұрғындардың саны шамамен 300 адамға жеткен. Теміржол бойында кемінде 50 бауырластар зираты бар.