Бүгінде мемлекет тарапынан кітапхалаларға үлкен қолдау көрсетіліп отыр деуге болады. Елімізде 11 мыңға жуық кітапхана бар десек, онда 300 миллионнан астам кітап қоры сақталған екен. Алматыдағы Ұлттық кітапханың өзінде 7 миллионнан астам кітап қоры бар.
Жақында Ұлттық кітап күніне орай Алматы қаласы Мәдениет басқармасына қарасты «Орталықтандырылған кітапхана жүйесі» КММ-нің №31 кітапхан-бөлімшесінде «Қазақ әдебиеті – ғасырлар қойнауынан жеткен әдеби мұра» тақырыбында келушілерге шеберлік сағаты өткізіліп, «Кітап – тарих, шежіре!» атты кітап көрмесі ұйымдастырылды.
Біздің кітапханада айтулы күндерге, сондай-ақ белгілі тұлғалардың мерейтойларына орай, олардан қалған мұраларды дәріптеу мақсатында көптеген шаралар өтіп тұрады. Бұл орайда «Мәдени мұра – рухани қазына», «Қоғам үшін еңбек ету – парыз», «Жыл кітаптарын бірге оқиық» және «Кітаптағы құпияларды білгім келеді» тақырыптарындағы шаралар бұған дәлел. Әсіресе №193 мектептің 5-6 сыныптарының оқушылары кітапханаға келіп, оқыған кітаптарын өзара талқылап, пікір-сайыстарға қатысуға дағдыланғанын айтуға болады.
Таяуда ғана «Ұлы Жеңіске мәңгілік тағзым» ерлік сабағы өткізіліп, «Ұрпаққа ұран болған Ұлы Жеңіс» тақырыптарында көрме ұйымдастырылды, Әлия Молдағұлованың туғанына 100 жыл толуына орай, «Батыр қызы халқының» тақырыбында еске алу сағаты жоспарланып отыр. Бұдан бөлек, қазақтың бас ақыны Абай Құнанбайұлының туғанына 180 жыл, қазақтың көрнекті ақындары Тұманбай Молдағалив пен Қадыр Мырза-Әлінің 90 жылдығы да ескерусіз қалмай, ақындардың кітаптары мен газет-журналдар бетінде жарияланған мақалаларынан кітап көрмесі ұйымдастырылған.
Қазір кітапхана қорында 6832 кітап бар. Оның ішінде қазақ тілінде – 1962, орыс тілінде – 2939, ағылшын, түрік, қырғыз, өзбек тілдерінде – 44 кітап сақталған. Биыл қорымыз қосымша 821 кітаппен толықты. Тек мектеп оқушылары ғана емес, түрлі сала мамандары мен зейнеткерлер де кітап алып оқиды. Бүгінде оқырман саны 13 мыңнан асып, тұрақты келетіндер мыңға жуықтаған. Кітапханада кітаптардан бөлек, мемлекеттік және ресми тілде мерзімді баспасөздермен де қамтамасыз етілген.
Кітапхана ұжымы үлкен-кіші демей, жалпы халықты кітап оқуға тарта отырып, кітапқұмарлар қатарын арттыруды, балалардың сауаттылығы мен білімін жетілдіруді әрі тілге деген құрмет пен Отансүйгіштікке тәрбиелеуді көздейді.