Жетісу ауданының комьюнити орталығында «Таза Қазақстан» республикалық бастамасы аясында «Қағаз boom» экологиялық акциясы ұйымдастырылды, - деп хабарлайды Aqshamnews.kz.
Іс-шараның негізгі мақсаты – қоғамда экологиялық мәдениетті дамыту, қалдықтарды бөлек жинау дағдысын қалыптастыру және тұрғындардың экосанасын арттыру.
Аудан тұрғындары, жастар мен студенттер белсенді қатысып, қажетсіз газеттерді, журналдарды, картон мен кеңсе қағаздарын тапсырды. Шамамен 2 тонна макулатура жиналып, арнайы қабылдау пунктіне жөнелтілді.
«Қоршаған ортаны қорғау – ортақ міндетіміз. Бүгінгі «Қағаз boom» акциясына тұрғындардың белсенді қатысуы – қоғамда экологиялық мәдениеттің өсіп келе жатқанын, азаматтардың экология мәселесіне жауапкершілікпен қарай бастағанын көрсетеді. Біз экологиялық бастамаларды одан әрі дамытып, жастарды табиғатқа ұқыпты қарауға тартуды жалғастырамыз», – деді Жетісу ауданы комьюнити-орталығының жетекшісі Есен Әбдіхалық.
Ұйымдастырушылардың айтуынша, мұндай экологиялық іс-шаралар тұрақты түрде өткізіліп тұрады. Бұл тұрғындарды қоршаған ортаға ұқыпты қарау мәдениетін қалыптастыруға мүмкіндік береді.