Бұл қазақ тіліндегі діни сөздердің алғашқы орфографиялық сөздігі деп айтуға болады.
Сөздіктің құрастырушысы және редакторы – филология ғылымдарының кандидаты Рашид Мұхитдинов, жауапты редакторы – фиолология ғылымдарының докторы, профессор Құралай Күдеринова, деп хабарлайды Almaty-akshamy.kz ҚМДБ баспасөз қызметіне сілтеме жасап.
Алматыда өтіп жатқан Ғұламалар кеңесінің ХХХІІІ мәжілісінде «MUFTIYAT» баспасынан жарық көрген «Қазақ тіліндегі діни сөздер мен терминдердің орфографиялық сөздігі» кітабының таныстырылымы өтті.
Жинақтың таныстырылымына Бас мүфти Наурызбай қажы Тағанұлы бастаған Ғұламалар кеңесі мүшелері қатысты.
«Тәуелсіздіктен кейін шыққан діни әдебиеттерде, аудармаларда, ғылыми еңбектерде, әлеуметтік желілерде, тіпті Қазақстан мұсылмандары діни басқармасының мақұлдауымен жарыққа шыққан еңбектер мен ҚМДБ-ға қарасты сайттарда да діни сөздердің, терминдердің жазылуында бірізділіктің жоқ екендігі байқалып тұрады. Әсіресе, діни еңбектерді аударма жасағанда араб, түрік, парсы, орыс тілдерінің ықпалы көрініс беріп жатады. Осыны ескеріп, Қазақстан мұсылмандары діни басқармасы қазақ тілінің ережелеріне сай дін саласындағы сөздер мен терминдердің жазылуын бір ізге түсіру үшін діни сөздер мен терминдерінің орфографиялық сөздігін құрастыруды қолға алды. Бұл қазақ тіліндегі діни сөздердің алғашқы орфографиялық сөздігі деп айтуға болады», – деді Бас мүфти.
Сөздікте қазақ мәтіндеріндегі діни сөздер мен сөз тіркестерінің және діни терминдердің дұрыс жазылу емлесі көрсетілген. Сөздіктің негізгі мақсаты – ислами дискурстағы және жалпы әдеби тіл мәтіндеріндегі діни сөздердің дұрыс жазылу нормасын көрсету. Діни сөздердегі араб тіліне тән кей әріптердің жазылуына қатысты ескертулер жеке ереже ретінде берілді. Сондай-ақ сөздікті құрастыруда қазақ тіліндегі 500-ден астам діни және әдеби еңбектер, оқу құралдары, монографиялар, ғылыми мақалалар, БАҚ материалдары, діни ресми сайттар пайдаланылды.
«Қазақ тіліндегі діни сөздер мен терминдердің орфографиялық сөздігі» жинағы Қазақстан мұсылмандары діни басқармасының сараптау коммиссиясының мақұлдауынан өткен. А.Байтұрсынұлы атындағы Тіл білімі институты Ғалымдар кеңесінің №16 хаттамасымен баспаға ұсынылған.