Алматыда көрнекті әдебиеттанушы ғалым, профессор Бейсембай Кенжебайұлының құрметіне мемориалдық тақтаның салтанатты ашылу рәсімі өтті.
Іс-шараға Алматы қаласы әкімінің орынбасары Арман Қырықбаев, қалалық Мәдениет басқармасының басшысы Ғани Майлибаев, қазақ әдебиетінің майталманы Дулат Исабеков, М.Әуезов атындағы Мәдениет және өнер институтының директоры, академик Кенжехан Матыжанов және әдебиеттанушы ғалымның шәкірттері, туған-туыстары, жас әдебиет сүйер қауым қатысты.
Шараны Бейсембай Кенжебайұлының шәкірті, әдебиеттанушы, филология ғылымының докторы, профессор Құлбек Ергөбек жүргізіп отырды. Мемориалды тақтаны ашуға мұрындық болған Алматы қаласы әкімінің орынбасары Арман Қырықбаев айтулы күнде жиналған қауымға ризашылығын білдірді.
Бейсембай Кенжебайұлы ғалым, филология ғылымының докторы, профессор. «Жас қайрат», «Лениншіл жас», «Кеңес туы», «Оңтүстік Қазақстан», «Социалистік Қазақстан» газет-журналдарында еңбек еткен.
Жазушы, Қазақстан Республикасының Мемлекеттік сыйлығының иегері Дулат Исабеков сөйлеген сөзінде әдебиеттанушы ғалым туралы естеліктерімен бөлісті. Әсіресе, Әл-Фараби атындағы ҚазҰУ (ол заманда Киров атындағы мемлекеттік университет) білім алып жүрген кездегі ұстаздық еткен күндерді еске алды.
«Бейсекең біздің КазГУ-де оқып жүргенде сабақ берді. Мен сол үшін өзімді бақытты сезінемін. Қайратты, шашы кірпікшешеннің тікенегіндей, диірменнің тасын қойсаң жатпайтын шаш болатын... Батыл-батыл пікірлерін айтып келіп, сендер осыған қалай қарайсыңдар, – дегенде, бәріміз қолдаушы едік. Тұрып-тұрып, әй осы сендер өтірік қолдайсыңдар ғой дейм. Неге менің айтқанымның бәрін қолдай бересіңдер, – деп таңқалатын. Шындықты айтпайсыңдар ғой сендер...», – деп естеліктерімен бөлісті.
Ал Кенжехан Слямжанұлы Матыжанов болса, «Біз Бейсекеңнің дәрісін тыңдамадық. Бірақ біздің ұрпақ Бейсекеңнің еңбектері мен кітаптарыменен ауызданған ұрпақ», – деп атап өтті. Ғалымның XX ғасырдың басындағы қазақ әдебиеті мәселелерін концептуалды деңгейде зерттегенін айрықша айтты.
Салтанатты шарада Бейсембай Кенжебайұлына арналған екі кітаптың тұсауы кесілді.