Алматы қаласындағы №196 жалпы білім беретін мектепте 13–23 қазан аралығында Республика күніне арналған патриоттық және мәдени іс-шаралар легі өтіп жатыр, - деп хабарлайды Aqshamnews.kz.
Мерекенің басты мақсаты – оқушылардың бойында отансүйгіштік сезімді, азаматтық жауапкершілік пен ел тағдырына бейжай қарамау қасиеттерін қалыптастыру болды.
Іс-шаралар аясында 1–11 сынып оқушыларына Тәуелсіздік пен егемендік тақырыбындағы ашық сабақтар ұйымдастырылды. 4-сынып оқушыларының «Менің елім – менің отбасым» атты сурет көрмесі көрермендердің көңілінен шығып, жас қылқалам шеберлерінің елге деген сүйіспеншілігін айқындады. 5-сынып оқушыларының «Қыран елім – Қазақстаным!» флешмобы мен жоғары сынып оқушыларының «Қазақстан болашағы» атты эссе байқауы мектептің мерекелік рухын одан әрі арттыра түсті. Үздік шығармалар авторлары марапатталып, жұмыстар әлеуметтік желілерде жарияланды.
Оқушылар тек мектеп қабырғасында ғана емес, қоғаммен де байланыс орнатты. 7-сынып оқушылары аудан ардагерлеріне арнайы барып, өнерлерін көрсетті, жылы лебіздерін білдіріп, қариялардың батасын алды. Ал 10-сыныптар «Дәмді Қазақстан» ұлттық тағамдар фестивалі аясында түрлі ұлттардың ас мәзірін таныстырып, ел бірлігінің дәмін ұсынды. Сонымен қатар, мектепішілік спорттық жарыстар мен ұстаздардың «Менің елім осындай!» әнімен шырқаған хоры мерекенің ажарын ашты.
Республика күніне арналған барлық іс-шаралар оқушылардың ұлттық сана-сезімін нығайтып, елге деген сүйіспеншілігін арттыруға бағытталды. Мектеп ұжымы мен оқушылары ұйымдастырған мерекелік шаралар ел бірлігінің, татулық пен патриотизмнің жарқын көрінісіне айналды.