Алматы №4 қалалық клиникалық ауруханасында «Өмірге үміт сыйла» қайырымдылық науқаны аясында Донор күні өтті.
Іс-шара Республика күніне орай ұйымдастырылып, донорлық мәдениетті дамыту мен қан құюды қажет ететін науқастарды қолдауға бағытталды.
Науқанға аурухананың 60 қызметкері - дәрігерлер, медбикелер және әкімшілік бөлім қызметкерлері қатысты.
Барлығы 30 литрден астам қан және оның компоненттері жиналды. Қан ауыр жарақат алған, анемия, отадан кейінгі асқыну және донорлық көмекті қажет ететін өзге де жағдаймен күресіп жатқан науқастарды аман алып қалуға бағытталатын болады.
«Біз үшін донор болу - жай ғана рәсім емес, кәсіби әрі адами борышымыздың көрінісі. Әрқайсымыз сын сағатта жатқан науқас үшін бір бірлік қанның қаншалықты маңызды екенін жақсы түсінеміз», - дейді Пациенттерді қолдау және ішкі аудит қызметінің жетекшісі Диас Даулетбаев.
Қан тапсырар алдында барлық қатысушы терапевтің қабылдауынан өтіп, қан қысымын өлшетіп, зертханалық тексеруден өтті. Іс-шара Алматы Қалалық қан орталығы мамандарының бақылауымен ұйымдастырылды.
№4 қалалық клиникалық ауруханада мұндай іс-шараны өткізу игі дәстүрге айналған. Клиника басшылығының айтуынша, ұжымдық донорлық өзара қолдау мәдениетін қалыптастырып, әрбір адамның өмірді құтқаруға үлес қосып жатқанын сезіндіреді.
«Әр тамшы қан - бір өмірге мүмкіндік. Донор күні - дәл қазір өмір үшін күресіп жатқан жандарға үміт сыйлаудың бір жолы», - деп атап өтті №4 ҚКА ұжымы.
Клиника донорлық науқанды тұрақты түрде жалғастыруды жоспарлап отыр.