Жазғы демалыс қыза түсті. Ауа райының ашық тұруы балалардың көп уақытын үйден гөрі сыртта: жағажайда, спорттық алаңдарда өткізулеріне және қала көшелерінде жай серуендеулері үшін жақсы мүмкіндік. Тәжірибе көрсетіп отырғандай, осы кезеңде балалардың жарақат алу жағдайлары жиілейді. Мектеп оқушыларына жазда қандай қауіп бар және оның алдын қалай алуға болатынын ӨКҚ алаңында Алматы қаласының «Балалар шұғыл медициналық жәрдем орталығының» қабылдау бөлімінің меңгерушісі Мейіржан Құрманалиев айтып берді, деп хабарлайды Almaty-akshamy.kz.
Балалар жарақатына қатысты статистика жаға ұстатарлық – жыл басынан бері Алматы дәрігерлеріне 42 069 бала жүгінген. Өткен жылы бұл көрсеткіш 80 мыңнан асқан болатын.
Көбіне төменгі сынып оқушылары жиі жарақаттанып қалады. Балалар самокаттан, велосипедтен, әткеншектен құлап қалулары мүмкін. Кейде үй жағдайында тұрмыстық жарақат алып жатады. Мұндай көрсеткіш 44%-ға тең. Ал көшеде балалардың 35%-ы жарақаттанады.
Балалардың жарақаттануына жиі себеп болатын жағдайлар ретінде сарапшы ересектердің жауапсыздығын және балалардың қараусыз қалуын, балалардың тәртіпсіздігін, қайғылы жағдайлар мен басқа да себептерді атады.
«Бұл жерде де ата-аналардың ролі маңызды. Олар балалармен сөйлесіп, қарапайым қауіпсіздік ережелерін түсіндірулері керек. Демалыс кезінде бала күннің көп бөлігін таза ауада өткізеді. Сол себепті оған міндетті түрде көшеде қауіпсіз жүру ережелерін үйреткен жөн. Ойын кезінде кішкентай балаларды қараусыз қалдырмаған дұрыс. Қаламызда жылдам қарқынмен дамып жатқан балалар алаңдары, демалыс аймақтары көп. Өкінішке қарай, көптеген ата-аналар осыған мән бермейді. Қабылданған қауіпсіздік шараларына қарамай, балалар ата-аналарының жауапсыздығынан көптеген жарақаттармен түсіп жатады», - деп бөлісті дәрігер.
Мейіржан Құрманалиев ересектерге жол қозғалысы ережелерін сақтау туралы балаларға жиі айтып, қауіпсіздік техникасы бойынша нұсқаулықтар өткізуді, дәрі-дәрімекті балаларға қолжетімсіз жерге қоюды, балаларды ешқашан жағада және суда қараусыз қалдырмауды, ыстық ауа райында балаларға бас киім киюді және оларды күннен қорғауға кеңес береді. Ата-аналар балаларына тез тұтанатын, тесетін, кесетін, жарылғыш және атыс қаруының не екенін және олардың қандай қауіп төндіретінін түсіндіруге міндетті.
Балаларға қиын жағдайға тап болғанда, олар ата-анасына ғана емес, жедел қызметтерге де қоңырау шала алатындарын айтып, түсіндіру керек. Бұл қызметтердің телефон нөмірлерінің тізімі үйде ең көрінетін жерде орналастырылуы керек. Бұл сандарды бала жатқа білсе, тіпті жақсы.