Әлемге әйгілі италиялық тенор Андреа Бочелли Алматыға жасаған сапарынан алған әсерін бөлісті, деп хабарлайды Aqshamnews.kz тілшісі.
28 қазанда Almaty Arena-да өткен концертіне орай қалаға келген өнер жұлдызы Instagram парақшасына фотосуреттер жариялады. Онда әнші дәстүрлі қазақ шапанын, аң терісі салынған жағалы камзолды киіп тұрғанын көруге болады.
Бочеллидің алғашқы жеке концерті
Андреа Бочелли - әлемдегі ең танымал опера тенорларының бірі, 66 жастағы италиялық әнші әрі композитор. Ол 15-тен астам студиялық альбом жазып, классика мен поп-музыканы үйлестірген ерекше вокалымен танылған.
Алматыдағы концерт - оның Қазақстандағы алғашқы жеке өнер көрсетуі болды. Зал толы көрермен артисті ерекше ықыласпен қарсы алып, әлеуметтік желілерде тарихи сәтке куә болғандарын жазып, әсерлерін бөлісті.