Әр аптаның соңында ұйымдастырылатын ауыл шаруашылығы жәрмеңкелері қала тұрғындары үшін тиімді сауда алаңына айналды. Бұл жолы алматылықтарға өз өнімдерін ұсынуға Шығыс Қазақстанның фермерлері келді. Жәрмеңке Қазыбек би көшесінде, Панфилов пен Абылай хан көшелерінің аралығында ұйымдастырылды.
Таңғы сауда баяу басталғанымен, түске қарай жәрмеңке қыза түсті. Біз оны сөмкелерін толтырып, риза көңілмен қайтып жатқан жұрттың жүзінен байқадық.
Жәрмеңке сөрелерінде шығыстың әйгілі балынан бастап, табиғи сүт өнімдері, май, құрт, қымыз, ет пен көкөністің сан түрі самсап тұр. Әсіресе Катонқарағайдан келген бал мен прополис, пантокрин мен ара тозаңына сұраныс жоғары. Әр келуші өз денсаулығына пайдалы дүниені алуға тырысып, сатушылармен жылы әңгіме құрып жатыр.
Мәселен, Аягөзден келген Ләззат Мусаева, сүт өнімдерін сатуға келген.
"Бізді осы жәрмеңкеге шақырғанда қуана келістік. Алматы жұртының талғамы жоғары, бірақ сонымен қатар сапалы өнімді бағалай біледі. Май мен құрт жақсы өтіп жатыр. Кеш батқанша бәрін сатып, елге жеңіл қайтсақ деген үмітіміз бар", – дейді ол күлімдеп.
Келушілердің көбі жәрмеңке жайлы газет беттерінен, әлеуметтік желіден және таныстарынан естіп келген. Алматылық Марина Матхамова да осындай тұрақты сатып алушылардың бірі:
"Бұл жердің бағалары мен сапасы көңілге қонымды. Ең бастысы – өнім тікелей өндірушіден келеді. Бүгін ет пен бауыр алдым. Көк базардағыдан едәуір арзан. Осындай шаралар жиі ұйымдастырылса, жұрт та ұтады, фермерлер де риза болады", – дейді ол.
Шығыс қазақстандық бал өндіруші Сергейдің де пікіріне құлақ түрдік.
"Біз балдың барлық табиғи өнімдерін алып келдік. Ара тозаңы мен пантокринге сұраныс жоғары. Бұл өнімдер иммунитетті көтереді, ағзаны сергітеді. Көпшілік қызығып, алып жатыр. Осындай тікелей сауда – нағыз халыққа пайдалы іс", – дейді ол.
Шығыстың балы мен етін іздеп келген Ілияс Сыдықов былай дейді:
"Әр демалыс сайын келеміз. Осындай жәрмеңкелер көп болса екен. Бағалары тиімді, таңдау көп. Міне, үйге ет, бал, сүт алдық. Тіпті көршілерге де хабар жазып жібердік, үлгерсін деп. Балдың келісін 2000 теңгеден алдым. Таза өнім. Ал ет 3000 теңгеден сатылып жатыр. Мұндай мүмкіндік жиі бола бермейді", – дейді.
Ал Дархан Нұрахметов тауардың шыққан жеріне ерекше мән беретінін айтты:
"Кейде күмәнданып қаласың. Шынымен сол айтылған жақтан әкелінді ме, әлде жергілікті ме деп. Бірақ көліктің нөміріне қарасақ, бәрі нақты. Бұған дейін Аягөздің етін алғанмын, дәмі тіл үйіреді. Осындай сенімді жәрмеңкелерді ұйымдастырғандарға рахмет", – дейді ол.
Қаланың жеке секторында тұратын көптеген отбасы қыс қамын жасап, картоп, пияз, сәбіз секілді көкөністерді қап-қаптап алып жатқанын байқадық.
"Қыстың қамын жазда ойла" дегендей, үйдің жертөлесін толтырып алсақ, көңіл тыныш. Мұнда бағасы базардан әлдеқайда арзан, әрі өнім сапасы да жақсы", – дейді алматылық зейнеткер Шынар апай.
Жұлдыз Құрманбекова да тұрақты келушілердің бірі екен:
"Әр апта сайын келеміз. Тауар көп, бағасы тиімді. Әсіресе бал мен сүт өнімдері таза әрі дәмді. Көк базардан 20-30 пайызға арзанға түседі", – дейді ол.
Ауыл шаруашылығы өнімдерін қолжетімді бағада алу бүгінде қала тұрғындары үшін өте тиімді. Мұндай жәрмеңкелер бір жағынан – алматылықтарға арзан әрі сапалы азық-түлік алу мүмкіндігін берсе, екінші жағынан – ауыл шаруашылығы өндірушілеріне өз өнімін тікелей тұтынушыға ұсынуға жол ашады.