Алматы қаласы әкімінің орынбасары Нұрлан Әбдірахым мен Қоғамдық денсаулық сақтау басқармасының басшысы Марат Пашимов қаланың денсаулық сақтау нысандарына қатысты кеңес өткізді.
Кеңесте №3, 5, 7, 12, 18, 20, 21 және 27 қалалық емханаларда, Адам репродукциясы орталығында, №2, 3 және 8 жедел жәрдем қосалқы станцияларында, сондай-ақ «Балалар үйі» қалалық мамандандырылған мекемесінде және «Алау» оңалту орталығында жүргізіліп жатқан күрделі жөндеу жұмыстарының аяқталу мерзімі талқыланды. Барлық нысан мүмкіндігі шектеулі азаматтардың ыңғайына бейімделеді. Жұмыс кестесінен кешігіп жатқан мердігер ұйымдарға ескерту жасалды.
Сондай-ақ, Медеу ауданында жедел жәрдем қосалқы станциясын, Түрксіб ауданында отбасылық амбулаторияны салу жобалары, сондай-ақ, №16 емхана мен патологоанатомиялық бюроны сейсмикалық күшейту, қалпына келтіру және мен күрделі жөндеу жұмыстарының жобалары қаралды.
Әкімнің орынбасары туындаған мәселелерді жедел шешу қажеттігін және бұл жұмысты Қоғамдық денсаулық сақтау басқармасымен, Құрылыс басқармасымен, Қала құрылысын бақылау басқармасымен және мердігер ұйымдармен тығыз өзара қарым-қатынаста атқару маңызды екенін атап өтті.
Барлық жұмыс Алматы қаласы әкімдігі мен Қоғамдық денсаулық сақтау басқармасының жіті бақылауына алынған.